Таниқли қиличбоз ва МОҚ собиқ раиси Собир Рўзиев вафот этди
У жаҳон чемпионатларида 2 та олтин, 1 та кумуш ва 1 та бронза медални қўлга киритган.
Ўзбекистон қиличбозлиги ривожига катта ҳисса қўшган таниқли спортчи, Москва-1980 ёзги Олимпия ўйинлари кумуш медали совриндори ҳамда Ўзбекистон Миллий олимпия қўмитасининг собиқ раиси Собир Рўзиев 73 ёшида вафот этди. Бу ҳақда Миллий олимпия қўмитаси матбуот хизмати хабар берди.
Собир Рўзиев спортчилик фаолияти давомида жаҳон чемпионатларида 2 та олтин, 1 та кумуш ва 1 та бронза медални қўлга киритган.
У Ўзбекистон қиличбозлиги тарихида муносиб из қолдирган спортчилардан бири бўлиб, мамлакатда ушбу спорт турининг ривожига катта ҳисса қўшган. Марҳумга «Ўзбекистон Республикасида хизмат кўрсатган спортчи» фахрий унвони берилган.
Ўзбекистон Миллий олимпия қўмитаси Собир Рўзиевнинг вафоти муносабати билан унинг оила аъзолари ва яқинларига чуқур ҳамдардлик билдирди.
