Шахмат бўйича “Ўзбекгидроэнерго” АЖ очиқ чемпионати ғолиблари аниқланди

Давлат мустақиллигининг 35 йиллиги арафасида вазирлик ва идоралар ҳамда акциядорлик жамиятларининг марказий аппаратлари ходимлари ўртасида шахмат бўйича анъанавий “Chess Board Open Championship of “Uzbekhydroenergo” JSC” очиқ чемпионати ўтказилди.

 

 

Мусобақа “Ўзбекгидроэнерго” АЖ ташаббуси билан ходимлар ўртасида шахматни оммалаштириш, уларни спорт мусобақаларига кенг жалб этиш ҳамда соғлом рақобат муҳитини шакллантириш мақсадида ташкил этилди. Чемпионат “Ягона Ватан, ягона халқ бўлиб, янги ҳаёт ва келажак яратамиз!” шиори остида ўтказилди.

 

 

22 август куни Ёшлар ижод саройида чемпионатнинг асосий финал босқичи бўлиб ўтди. Унда Ўзбекистон Шахмат федерациясининг малакали ҳакамлари фаолият олиб борди. Беллашувлар ФИДЕ қоидалари асосида швейтсар тизимида ташкил этилиб, иштирокчилар 11 тур давомида ғолиблик учун баҳслашди.

 

 

Финал босқичида 120 нафардан ортиқ иштирокчи шахмат тахтаси атрофида ўзаро куч синашди.

 

 

Мусобақа якунларига кўра, “Ўзавтосаноат” АЖ вакили Фаррух Ражабов биринчи ўринни эгаллади. “Асакабанк” АЖ ходими Даврон Сулаймонов иккинчи, Ички ишлар вазирлиги вакили Шербек Хуррамов эса учинчи ўринни қўлга киритди.

 

Ғолиб ва совриндорларга тантанали тақдирлаш маросимида пул мукофотлари топширилди. Жумладан, биринчи ўрин соҳиби Фаррух Ражабов 130 миллион сўм, иккинчи ўрин соҳиби Даврон Сулаймонов 100 миллион сўм, учинчи ўрин соҳиби Шербек Хуррамов эса 70 миллион сўм миқдоридаги пул мукофоти билан тақдирланди.

 

Шунингдек, мусобақанинг турли номинацияларида муносиб иштирок этган бир қатор шахматчиларга “Ўзбекгидроэнерго” АЖнинг қимматбаҳо ва эсдалик совғалари топширилди.