Алкоголь ва тамаки соҳасига оид 8 та ҳужжатга 28 та ўзгартириш киритиш таклиф этилди
Алкоголь ва тамаки бозорини тартибга солиш бўйича қонунчиликни такомиллаштиришга қаратилган янги лойиҳалар Вазирлар Маҳкамасига киритилди.
Ўзбекистонда алкоголь ва тамаки бозорини тартибга солувчи қонунчиликни такомиллаштириш бўйича янги таклифлар ишлаб чиқилди.
Алкоголь ва тамаки бозорини тартибга солиш инспекцияси ташаббуси билан 8 та норматив-ҳуқуқий ҳужжатга 28 та ўзгартириш ва қўшимча киритиш бўйича лойиҳалар тайёрланиб, Вазирлар Маҳкамасига киритилган.
Шунингдек, соҳадаги ишлаб чиқариш жараёнларини халқаро талаблар асосида ташкил этиш учун 5 та янги стандарт ишлаб чиқилган. Яширин иқтисодиёт кўламини аниқлаш ва илмий ёндашувларни кенгайтириш мақсадида Тошкент давлат иқтисодиёт университети ҳамда Тошкент кимё-технология институти билан ҳамкорлик меморандумлари имзоланган.
Жорий йилнинг дастлабки олти ойида лицензиялаш бўйича 71 та ариза кўриб чиқилган. Натижада 2 та алкоголь ишлаб чиқарувчи ва 15 та улгуржи корхонага лицензия, 8 та омборхонага рухсатнома берилган. Лицензия тўловлари бўйича мониторинг натижасида 6,1 млрд сўм маблағ ундирилиши таъминланган.
Шу даврда 318 та технологик йўриқнома ўрганилиб, 241 таси келишилган, 77 таси эса аниқланган камчиликлар сабаб рад этилган. Ишлаб чиқариш линияларидаги 275 та электрон ҳисоблагич муҳрланган.
Биржа савдолари орқали этил спирти харид қилиш бўйича келиб тушган 37 та талабноманинг 30 тасига рухсат берилган.
Ҳозирда мамлакатда алкоголь ва тамаки соҳасида 12 856 та субъект фаолият юритмоқда. Уларнинг 12 288 таси чакана, 496 таси улгуржи савдо корхонаси, қолганлари эса ишлаб чиқариш билан шуғулланади.
