Россияда икки Тожикистон фуқароси аёллар кийимида юргани учун депортация қилинади
Шунингдек, уларга нисбатан 10 суткалик маъмурий қамоқ жазоси тайинланган.
Россиянинг Москва шаҳрида икки Тожикистон фуқароси аёллар кийимида жамоат жойида юргани ортидан маъмурий жавобгарликка тортилди. Люблин суди уларни 10 суткага маъмурий қамоққа олиш ва Россия ҳудудидан чиқариб юбориш ҳақида қарор қабул қилган. Бу ҳақда маҳаллий нашрлар суд материалларига таяниб хабар берди.
Суд материалларига кўра, Ҳ.Раҳимов ва Й.Саизода 18 август куни Москванинг «Садовод» бозорида қўлга олинган. Полиция маълумотида улар аёллар кийимида бўлгани ва кийимларда “танлов эркинлиги” мазмунидаги шиор акс этгани қайд этилган.
Ҳуқуқни муҳофаза қилувчи органлар уларнинг ҳаракатларини Россияда тақиқланган “ноанъанавий жинсий муносабатларни тарғиб қилиш” сифатида баҳолаган. Бироқ суд материалларида кийимларнинг аниқ тавсифи ва шиорнинг қандай кўринишда бўлгани батафсил кўрсатилмаган.
Судда Раҳимовнинг турмуш қургани ва бир нафар фарзанди борлиги, Саизоданинг эса тўрт нафар вояга етмаган фарзанди борлиги маълум бўлган.
Суд қарорига кўра, фуқаролар Сахарово чет эл фуқаролари учун мўлжалланган махсус ҳибсхонага жойлаштирилади. Шунингдек, уларни 17 ноябргача Россиядан депортация қилиш ҳамда суд қарори чиқарилган кундан бошлаб беш йил муддатга Россияга киришини тақиқлаш белгиланган.
