Сариосиё–Термиз йўналишидаги поезд нега гавжум? “Ўзтемирйўлйўловчи” изоҳ берди

 

Ижтимоий тармоқларда “Сариосиё – Термиз” йўналишида қатновчи шаҳарлараро поезднинг йўловчилар билан гавжумлиги акс этган видеолар тарқалди. Видеоларда йўловчиларнинг вагон йўлакларида тўпланиб қолгани кўринади.

 

Мазкур ҳолат юзасидан «Ўзтемирйўлйўловчи» АЖ матбуот хизмати муносабат билдирди.

 

Қайд этилишича, “Сариосиё – Термиз” йўналишидаги поезд 4 та йўловчи вагонидан иборат бўлиб, жамоат транспорти тамойили асосида фаолият юритади. Ушбу йўналишда чипталар ўриндиқ рақами кўрсатилмаган ҳолда, яъни жойсиз сотилади. Йўловчилар бўш ўринларга жойлашади. Ҳар бир вагон 81 нафар йўловчини ўтирган ҳолда ташишга мўлжалланган.

 

Корхона маълумотига кўра, мазкур қатнов аҳолига қулай ва ҳамёнбоп транспорт хизматини кўрсатиш мақсадида ташкил этилган. Йўналишга талаб юқори бўлгани, айниқса, дам олиш ва байрам кунларида йўловчилар оқими кескин ошиши сабабли айрим қатновларда гавжумлик кузатилиши мумкин.

 

Шунингдек, поезд вагонларида ёз мавсумида совутиш, қиш мавсумида эса иситиш тизимларининг ишлаши таъминланиши маълум қилинган.

 

Ижтимоий тармоқларда тарқалган видеодаги ҳолат бўйича масъул мутахассислар томонидан ўрганиш ишлари олиб борилмоқда. Йўловчиларга янада қулай, хавфсиз ва сифатли хизмат кўрсатиш учун зарур чоралар кўрилиши билдирилди.