Шавкат Мирзиёев ва Илҳом Алиев Бухоронинг тарихий обидаларини зиёрат қилди
Ташриф давомида Озарбайжон делегациясига Бухоронинг Буюк Ипак йўлидаги муҳим савдо, илм-фан ва таълим маркази сифатидаги асрлик тарихи ҳақида сўзлаб берилди.
Ўзбекистон Президенти Шавкат Мирзиёев ва Озарбайжон Президенти Илҳом Алиев рафиқалари ҳамроҳлигида Бухоронинг жаҳонга машҳур тарихий обидалари билан танишди.
Олий мартабали меҳмонлар Сомонийлар мақбараси, Арк қўрғони, Пойи Калон ва Лаби Ҳовуз мажмуалари ҳамда Кўкалдош мадрасасини зиёрат қилди.
Ташриф Исмоил Сомоний томонидан барпо этилган Сомонийлар мақбарасидан бошланди. Меҳмонларга обиданинг тарихи, меъморий хусусиятлари ва Шарқда илм-фан ҳамда маданият ривожидаги аҳамияти ҳақида маълумот берилди. Мазкур мақбара 1993 йилда ЮНЕСКОнинг Умумжаҳон мероси рўйхатига киритилган.
Шундан сўнг давлат раҳбарлари қадимий Арк қалъасига ташриф буюрди. асрлар давомида Бухоронинг сиёсий ва маъмурий маркази бўлган қалъа кейинчалик Бухоро ҳукмдорларининг қароргоҳи вазифасини бажарган. Бугунги кунда Арк Бухоронинг энг машҳур тарихий обидаларидан бири ҳисобланади.
Меҳмонлар Пойи Калон мажмуаси билан ҳам танишди. Марказий Осиёнинг энг салобатли меъморий мажмуаларидан бири бўлган ушбу ансамбль таркибидан 1127 йилда бунёд этилган Калон минораси, XVI аср бошларига оид Калон масжиди ва Мир Араб мадрасаси ўрин олган.
Шунингдек, Шавкат Мирзиёев ва Илҳом Алиев Лаби Ҳовуз мажмуасини зиёрат қилди. Қадимий ҳовуз атрофида шаклланган ушбу тарихий масканда Кўкалдош мадрасаси, Нодир Девонбеги мадрасаси ва хонақоҳи жойлашган.
Ташриф давомида Озарбайжон делегациясига Бухоронинг Буюк Ипак йўлидаги муҳим савдо, илм-фан ва таълим маркази сифатидаги асрлик тарихи ҳақида сўзлаб берилди.
Шунингдек, меҳмонларга халқ ҳунармандчилиги намуналари ва тарихий обидалардаги бадиий безаклар намойиш этилди. Олий мартабали меҳмонлар Бухоронинг ўзига хос меъморий мероси, тарихий обидалари ва маданий анъаналари билан яқиндан танишди.
