"Эркакларнинг бир-бирини қучоқлаб, ўпиши тўғри иш эмас" — Тоқаев

 

Қозоғистон Президенти Қосим-Жомарт Тоқаев эркаклар, хусусан, ҳарбийлар ўртасида қучоқлашиш одатини танқид қилиб, бундай ҳолат қозоқ халқининг анъанавий одоб-ахлоқ меъёрларига мос келмаслигини таъкидлади. У бу ҳақда Остонада бўлиб ўтган парламент сайловларида овоз берганидан кейин журналистларга маълум қилган.

 

Давлат раҳбари суҳбатда эркакларнинг, ҳатто ҳарбий форма кийган генералларнинг ҳам бир-бирини қучоқлаётганига муносабат билдирган. Унинг таъкидлашича, бундай ҳолат қозоқ халқининг тарихий урф-одатларига хос эмас.

 

Тоқаев бундай вазиятни Иккинчи жаҳон урушида қатнашган совет маршаллари мисолида тасаввур қилиш қийинлигини айтиб, анъанавий муомала маданиятига қайтиш зарурлигини таъкидлаган.

 

Президент эркаклар ўртасидаги саломлашув ва самимий муносабатларда қўл бериб кўришиш, зарур ҳолатларда эса ўнг қўлни юрак устига қўйиш каби одатларни маъқул деб ҳисоблашини билдирган.

 

Шунингдек, Тоқаев жамиятдаги анъанавий муомала ва одоб-ахлоқ меъёрларини мустаҳкамлашга қаратилган хулқ-атвор кодексини ишлаб чиқиш ташаббусини илгари сурган. У ёшлар ва катта авлод вакилларини миллий анъаналарга ҳурмат билан муносабатда бўлишга чақирган.