АҚШ 200 минггача визаларни бекор қилиши мумкин
Виза бекор қилиниши унинг эгаси дарҳол АҚШдан депортация қилинишини англатмайди.
АҚШ президенти Доналд Трамп маъмурияти мамлакатда бошпана сўраган ёки бошпана олиш жараёнида бўлган хорижликларга берилган 200 минггача B1/B2 туристик ва бизнес визаларини бекор қилишни режалаштирмоқда. Бу ҳақда Associated Press АҚШ Давлат департаменти ҳужжатларига таяниб хабар берди.
Давлат департаменти Ички хавфсизлик департаменти билан ҳамкорликда АҚШга қисқа муддатли ташриф буюрувчи сифатида кириб, кейинчалик мамлакатда доимий қолиш мақсадида бошпана сўраган хорижликларнинг ноиммиграцион визаларини аниқлаш ва бекор қилиш устида ишламоқда.
AP маълумотларига кўра, тегишли чоралар келгуси ҳафталарда эълон қилиниши кутилмоқда. Улар асосан 2016–2026 йиллар оралиғида берилган B1/B2 визаларига тааллуқли бўлиши мумкин.
АҚШ Давлат департаменти вакили Томми Пиготт визалар бекор қилиниши мумкин бўлган аниқ сонни маълум қилмаган. Унинг қайд этишича, жараён давом этар экан, бекор қилинадиган визалар сони ўзгариб боради.
Виза бекор қилиниши унинг эгаси дарҳол АҚШдан депортация қилинишини англатмайди. Бироқ бундай шахснинг мамлакатга туризм ёки бизнес мақсадида кириш ҳуқуқи бекор қилинади ва унинг иммиграцион мақоми бошқа тартибда кўриб чиқилиши мумкин.
Мазкур режа амалга оширилса, АҚШ тарихидаги энг йирик оммавий виза бекор қилиш ҳолатларидан бири бўлиши ва суд жараёнларига сабаб бўлиши мумкин.
Эслатиб ўтамиз, аввалроқ АҚШ федерал суди Трамп маъмуриятининг 75 давлат фуқароларига иммиграцион визалар берилишини вақтинча тўхтатиш ҳақидаги сиёсатини ноқонуний деб топиб, ушбу қарорни бекор қилган эди.
