Cингапур оилаларга ҳар бир фарзанд учун 55 минг доллардан ортиқ ёрдам беради

 

Cингапур ҳукумати мамлакатда туғилиш даражасининг пасайишини жиловлаш мақсадида оилаларни қўллаб-қувватлаш чораларини кенгайтирмоқда. Янги ташаббус доирасида ота-оналарга ҳар бир фарзанд учун 17 ёшгача бўлган даврда қарийб 70 минг Cингапур доллари — 55 минг АҚШ долларидан ортиқ миқдорда молиявий ёрдам кўрсатилади. Бу ҳақда Financial Times хабар берди.

 

Cингапур Бош вазири Лоуренс Вонг 23 август куни қилган йиллик мурожаатида болалар нафақаси ва ота-оналик таътили тизимлари қайта кўриб чиқилишини маълум қилди. Ҳукумат фарзанд кўриш ва уларни тарбиялашни истаган оилаларга узоқ муддатли ёрдам кўрсатишни мақсад қилган.

 

2025 йилда Cингапурда туғилишнинг умумий коэффициенти рекорд даражада пасайиб, ҳар бир аёлга 0,87 нафар болани ташкил этди. 2024 йилда бу кўрсаткич 0,97 эди. Демографларга кўра, иммиграция ҳисобга олинмаган ҳолда аҳоли сонининг барқарор сақланиши учун туғилиш даражаси тахминан 2,1 бўлиши керак.

 

Ҳукумат томонидан ажратиладиган ёрдам таркибига:

• ҳар бир бола учун 17 ёшгача қарийб 70 минг Cингапур доллари миқдоридаги тўғридан-тўғри молиявий кўмак;

• 10 минг Cингапур доллари миқдоридаги туғилиш учун тўлов;

• боланинг кейинги таълими учун 10 минг Cингапур доллари миқдоридаги маблағ;

• болаларни парваришлаш бўйича нафақаларни кенгайтириш;

• кўп фарзандли оилаларни қўшимча қўллаб-қувватлаш;

• фарзандли оилаларга биринчи уйини сотиб олишда қўшимча имкониятлар яратиш киради.

 

Шунингдек, ҳукумат ота-оналик таътили тизимини ҳам қайта кўриб чиқади. Болаларни парваришлаш билан боғлиқ харажатларнинг катта қисмини давлат қоплашига эътибор қаратилади.

 

Лоуренс Вонг ҳукумат оилаларга фарзанд кўриш қарорида узоқ муддат давомида ёрдам беришини таъкидлади. Бироқ у кўрилаётган чоралар туғилиш даражасини қисқа муддатда ўрнини босиш даражасига олиб чиқмаслиги мумкинлигини ҳам қайд этди.

 

Шу сабабли Cингапур аҳолининг камайиб кетишининг олдини олиш учун туғилиш даражасини ошириш билан бир қаторда, иммиграция сиёсатини ҳам давом эттиради. Бош вазирнинг таъкидлашича, мамлакатга янги келувчилар “ўлчовли ва барқарор суръатларда” қабул қилинади.