Ислом цивилизацияси маркази жаҳон медиасига буюк мероснинг янги таянч нуқтаси сифатида тақдим этилди
Қарийб 50 давлатдан 300 нафарга яқин медиа ва экспертлар иштирокидаги форумда Ислом цивилизацияси марказининг халқаро медиа салоҳияти ҳамда буюк меросни замонавий мультимедиа форматларида ёритиш масалалари кўриб чиқилди.
25 август куни Тошкент шаҳридаги Ислом цивилизацияси марказида «Ислом цивилизацияси: янги нигоҳ — янги кашфиётлар» халқаро медиафорумнинг илк ялпи сессияси бўлиб ўтмоқда.
«Ўзбекистондаги Ислом цивилизацияси маркази — буюк мероснинг янги таянч нуқтаси» мавзусидаги сессияда CNN, BBC Studios, 1001 Inventions халқаро лойиҳаси, шунингдек, Ўзбекистоннинг давлат ва медиа ташкилотлари вакиллари иштирок этди.
Сессия Ислом цивилизацияси маркази директори Фирдавс Абдухолиқовнинг марказни янги турдаги маданий-маърифий медиа платформа сифатидаги салоҳиятига бағишланган маърузаси билан бошланди. Иштирокчиларга марказ фаолияти ва унинг имкониятларига бағишланган тақдимот ҳам намойиш этилди.
Тадбирда халқаро медиа компаниялари вакиллари ҳам иштирок этди. Жумладан, CNN вакили Paula Hancocks сессияга модераторлик қилди. CNN International Commercial ижрочи вице-президенти Фил Нелсоннинг махсус видео табриги намойиш этилди. Компаниянинг минтақавий вакили Имран Аҳмад эса «CNN Ўзбекистонни кашф этмоқда: ислом цивилизацияси мероси асосий йўналишга айланганида» мавзусида маъруза қилди.
Ўзбекистон Республикаси Президенти Администрацияси ҳузуридаги Оммавий ахборот воситалари учун контент тайёрлаш маркази директори ўринбосари Жаҳонгир Абдураҳмонов «Маданий мероснинг янги тили: тарих, илм-фан ва туризмнинг мультимедиа форматлари» мавзусида чиқиш қилди.
Шунингдек, 1001 Inventions лойиҳаси асосчиси Аҳмад Салим ва режиссёр Шоҳрух Расулов «Дунёни ўзгартирганлар: ислом цивилизациясининг буюк шахслари катта экранда» лойиҳасини тақдим этди. Тадбир давомида «Маърифат акс-садоси» лойиҳаси ҳам намойиш қилиниб, «Оскар» мукофоти совриндори Бен Кингсли иштирокидаги фильмдан махсус парча кўрсатилди.
BBC Studiosнинг Евроосиёдаги тижорий ваколатхонаси раҳбари Сергей Становкин эса ислом цивилизацияси меросини глобал медиа маконида тарғиб қилиш масаласида маъруза қилди.
Сессия якунида «Мерос садолари: ислом цивилизацияси жаҳон медиа маконида қандай янграмоқда?» мавзусида очиқ халқаро мунозара ўтказилди. Унда Мали, Озарбайжон, Миср, Нигер, Туркия, Яман, Тунис ва Ўзбекистон оммавий ахборот воситалари ҳамда профессионал уюшмалари вакиллари қатнашди.
Форумда AMAP, Saba, TAP, Anadolu Ajansı, Yeni Müsavat/Musavat медиа гуруҳи ҳамда Афро-Осиё медиа иттифоқи вакиллари ҳам иштирок этди.
Халқаро медиафорумнинг асосий майдони Ўзбекистондаги Ислом цивилизацияси маркази бўлиб, тадбирда қарийб 50 давлатдан 300 нафарга яқин медиа ва экспертлар ҳамжамияти вакиллари — медиа компаниялари, ахборот агентликлари ва телеканаллар раҳбарлари, журналистлар, продюсерлар, олимлар ҳамда креатив индустриялар мутахассислари жам бўлган.
