“Миллий манфаатларни ҳимоя қилиш, дунёдан ёпилиш дегани эмас” — Шерзод Асадов

 

Президент матбуот котиби Шерзод Асадов Тошкент шаҳридаги Ислом цивилизацияси марказида ўтказилаётган «Ислом цивилизацияси: янги дунё, янги ташаббуслар» халқаро медиа форумида нутқ сўзлади.

 

У нутқи давомида замонавий журналистика олдидаги долзарб вазифалар, ахборот хавфсизлиги, сунъий интеллект, сўз эркинлиги, миллий медиа ва журналистнинг жамиятдаги ўрни ҳақида фикр билдирди.

 

Шерзод Асадовнинг таъкидлашича, бугунги кунда ахборот чегара билмайди. Воқеалар ҳақидаги хабарлар қисқа вақт ичида миллионлаб одамларга етиб бораётган бир пайтда ёлғон ахборот, манипуляция, фейк хабарлар ва турли ахборот хуружлари ҳам тез тарқалмоқда. Шу боис журналистиканинг асосий вазифаларидан бири ишончли ва холис ахборотни таъминлашдан иборат.

 

Президент матбуот котиби сунъий интеллектнинг журналистикага жадал кириб келаётганига ҳам тўхталиб, у журналистнинг ўрнини босмаслигини, аксинча, унинг имкониятларини кенгайтиришини қайд этди.

«Технологиялар қанчалик ривожланмасин, журналистиканинг асосий мезонлари — ҳақиқат, холислик, виждон ва инсон манфаатига хизмат қилиш тамойиллари ўзгармаслиги керак», — деди Шерзод Асадов.

 

У замонавий журналистикадаги сўз эркинлиги масаласига ҳам эътибор қаратди. Унинг қайд этишича, айрим ҳолларда сўз эркинлигининг сиёсий босим воситасига айланиши журналистиканинг холислиги ва ишончлилигига салбий таъсир кўрсатмоқда.

 

Шерзод Асадов миллий манфаатларни ҳимоя қилиш дунёдан ёпилиш дегани эмаслигини таъкидлаган. Унинг фикрича, бу, аввало, фактларга таяниш, воқеаларни холис таҳлил қилиш ва жамият билан очиқ мулоқот ўрнатишни англатади.

 

Шунингдек, журналистнинг вазифаси фақат ахборот етказиш билан чекланмаслиги қайд этилди. Журналист жамиятдаги муаммоларни кўтариши, одамларнинг дарду ташвишларини эшитиши ҳамда жамоатчилик овозини давлат идораларига етказишда муҳим ўрин тутади.

 

Форум Ислом цивилизацияси марказида ўтказилаётгани ҳам алоҳида аҳамиятга эга экани таъкидланди. Шерзод Асадов ушбу маскан халқимизнинг кўп минг йиллик илмий ва маънавий меросини дунёга танитишда муҳим майдон бўлиб хизмат қилишини қайд этди.

 

Нутқда Хоразмий, Беруний, Ибн Сино, Имом Бухорий, Имом Термизий, Имом Мотуридий, Мирзо Улуғбек ва Алишер Навоий каби буюк алломалар мероси ҳақида ҳам сўз юритилди.

 

Президент матбуот котиби миллий меросни фақат музей ва китобларда сақлаш билан чекланиб қолмасдан, уни замонавий рақамли форматларда, ёш авлодга тушунарли тилда ва жаҳон жамоатчилигига холис етказиш зарурлигини таъкидлади.