“Ушбу ташриф яна бир муҳим саҳифани очди”: Саида Мирзиёева Илҳом Алиевнинг Ўзбекистонга ташрифи ҳақида
Саида Мирзиёева Озарбайжон Президентининг Ўзбекистонга ташрифи ҳақида фикр билдириб, икки давлат ўртасидаги биродарлик муносабатлари ва имзоланган Абадий дўстлик тўғрисидаги шартноманинг аҳамиятини қайд этди.
Ўзбекистон Президенти Администрацияси раҳбари Саида Мирзиёева Озарбайжон Президенти Илҳом Алиев бошчилигидаги делегациянинг Ўзбекистонга ташрифига муносабат билдирди.
Саида Мирзиёева Теlegram'даги саҳифасида Озарбайжон Президенти ва унинг оила аъзоларини Ўзбекистонда катта эҳтиром билан кутиб олинганини таъкидлади.
У Ўзбекистон ва Озарбайжон ўртасидаги муносабатларни биродарлик ришталари боғлаб туришини қайд этди. Унинг сўзларига кўра, икки халқ ўртасидаги яқинлик нафақат расмий алоқаларда, балки халқларнинг бир-бирига бўлган меҳр-оқибатида ҳам намоён бўлади.
“Тарихимиз, маданиятимиз ва анъаналаримиздаги муштараклик бугун инфратузилмадан то инвестицияларгача — кўплаб соҳалардаги янги қўшма лойиҳалар кўринишида янада бойимоқда. Ушбу ташриф кўп қиррали алоқаларимиз тарихида яна бир муҳим саҳифани очди”, — дея ёзди Саида Мирзиёева.
Ташриф доирасида икки мамлакат ўртасида Абадий дўстлик тўғрисидаги шартнома имзоланган.
Саида Мирзиёева ушбу ҳужжат номи Ўзбекистон ва Озарбайжонни боғлаб турган муносабатларнинг моҳиятини ифодалашини таъкидлади.
“Озарбайжонлик дўстларимизни Ўзбекистонда кўришдан ҳар доим хурсандмиз. Ҳамиша бағрини очиб сизни қарши оладиган диёримизга хуш келибсиз, азиз қардошлар!”, — дея ёзди у.
