“35 йил — тарих учун жуда қисқа давр, аммо асрга татигулик давр бўлди” — Шавкат Мирзиёев
Президент иштирокида давлат мукофотларини топшириш маросими бўлиб ўтмоқда.
Президент Шавкат Мирзиёев иштирокида Ўзбекистон мустақиллигининг 35 йиллиги муносабати билан давлат мукофотларини топшириш маросими бўлиб ўтмоқда.
Тадбир аввалида давлат раҳбари йиғилганларни мамлакатимиз мустақиллигининг 35 йиллиги билан самимий табриклади.
Президент ўз нутқида мустақиллик йилларида Ўзбекистонда амалга оширилган кенг кўламли ислоҳотлар, эришилган ютуқ ва натижаларга тўхталди.
«35 йил – тарих учун жуда қисқа давр. Лекин ортда қолаётган йиллар ўзининг кўлами, ютуқ ва натижалари билан асрга татигулик давр бўлди, десак, асло муболаға бўлмайди», — деди Шавкат Мирзиёев.
Давлат раҳбари мамлакат тараққиётида эришилаётган натижаларнинг ҳақиқий муаллифи меҳнаткаш ва олижаноб Ўзбекистон халқи эканини таъкидлади.
Мустақилликнинг қадр-қиммати, аввало, юрт равнақи учун фидокорона меҳнат қилаётган инсонлар фаолиятида намоён бўлаётгани қайд этилди. Хусусан, қишлоқ хўжалигида меҳнат қилаётган фермер ва деҳқонлар, ёш авлодга таълим-тарбия бераётган устоз ва мураббийлар, инсон саломатлиги ва ҳаётини асраётган шифокорларнинг хизматлари алоҳида эътироф этилди.
Шунингдек, илм-фан ривожига янги ғоя ва кашфиётлар билан ҳисса қўшаётган олимлар, замонавий корхоналар барпо этаётган саноатчи ва тадбиркорлар, шаҳар ва қишлоқларни обод қилаётган қурувчи ҳамда архитекторларнинг мамлакат тараққиётидаги ўрни таъкидланди.
