558 нафар фидойи инсон юксак давлат мукофотлари билан тақдирланди
Шавкат Мирзиёев барча ютуқлар халқнинг фидокорона меҳнати билан қўлга киритилаётганини таъкидлади.
Президент Шавкат Мирзиёев Ўзбекистон мустақиллигининг 35 йиллиги муносабати билан давлат мукофотларини топшириш маросимида бугун Янги Ўзбекистоннинг овози энг нуфузли минбарларда баланд янграётгани, мамлакатнинг халқчил ва тинчликпарвар сиёсати халқаро миқёсда эътироф этилаётганини қайд этди.
“Юқоридаги барча ўзгаришлар кўп миллатли халқимиз, сиз каби жонкуяр юртдошларимиз меҳнати билан амалга ошмоқда”, — деди Президент.
Таъкидланганидек, қайси соҳа ёки вазифада фаолият юритишидан қатъи назар, ҳар бир инсон учун ўз меҳнатининг муносиб эътироф этилишини кўриш катта бахтдир.
Мустақилликнинг 35 йиллиги муносабати билан ислоҳотларга дахлдорлик туйғуси билан яшаб, сидқидилдан меҳнат қилаётган 558 нафар фидойи инсон юксак давлат мукофотлари билан тақдирланди.
Президент мукофотланган юртдошларнинг ҳар бири мамлакат тараққиётига муносиб ҳисса қўшаётганини қайд этиб, уларнинг машаққатли меҳнат йўли ва эришган ютуқларини яхши билишини таъкидлади.
Мукофотланганлар орасида бутун умрини бунёдкорликка бағишлаган хоразмлик нуроний Рустам Султонов ҳам бор. Табаррук ёшда бўлишига қарамай, у вилоят нуронийларига бошчилик қилиб, маҳалла ва қишлоқларни обод этиш, ёшларни эзгу мақсадлар сари руҳлантириш борасида ибратли фаолият олиб бормоқда.
