“Электр узилди” деган гап одамларнинг эсидан чиқиб кетди — Шавкат Абдураззоқов
Наманган вилояти ҳокими вилоятда электр таъминоти яхшилангани ва йирик энергетика лойиҳалари амалга оширилаётганини таъкидлади.
Наманган вилояти ҳокими Шавкат Абдураззоқов вилоятда электр энергетикаси соҳасида амалга оширилаётган йирик лойиҳалар натижасида аҳолининг электр таъминотига бўлган ишончи ошганини таъкидлади.
Унинг қайд этишича, сўнгги йилларда Наманган вилоятида янги электр энергияси ишлаб чиқариш қувватларини яратишга қаратилган қатор йирик лойиҳалар амалга оширилмоқда.
Хусусан, вилоят ҳудудида ҳар бири 500 мегаватт қувватга эга иккита қуёш электр станцияси, Учқўрғон, Норин ва Уйчи туманларида умумий қуввати қарийб 300 мегаватт бўлган ГЭСлар, шунингдек, Поп туманида 200 мегаватт қувватли янги ГЭС қурилиши режалаштирилган.
Шавкат Абдураззоқов ушбу лойиҳаларни мамлакатда электр энергетикаси соҳасида амалга оширилаётган ислоҳотларнинг амалий натижаси сифатида баҳолади.
“Битта нарсага амин бўлиб, ҳамма қайтаряптики, Ўзбекистонда, Наманганда «электр узилди» деган гап одамларнинг эсидан чиқиб кетди”, — деди вилоят ҳокими.
