Покистонда туғруқхонадаги ёнғинда 14 чақалоқ ҳалок бўлди

 

Покистон пойтахти Исломободдаги Покистон Тиббиёт фанлари институти (PIMS) туғруқхонасининг янги туғилган чақалоқлар бўлимида ёнғин содир бўлди. Дастлабки маълумотларга кўра, ҳодиса оқибатида камида 14 чақалоқ ҳалок бўлган. Бу ҳақда Синхуа ахборот агентлиги хабар берди.

 

Ёнғин 26 август куни маҳаллий вақт билан соат 6:40–6:45 атрофида шифохонанинг учинчи қаватидаги янги туғилган чақалоқлар бўлимида юз берган. Ҳодиса жойига ўт ўчириш хизматлари, тез тиббий ёрдам бригадалари ва ҳуқуқни муҳофаза қилувчи органлар етиб келган.

 

Қутқарув ишлари давомида палатадаги бир нечта чақалоқлар бошқа бўлимларга олиб чиқилган. Полиция манбаларига кўра, тўққиз чақалоқ воқеа жойида, қолганлари эса шифохонанинг болалар бўлимига кўчирилганидан кейин олган жароҳатлари оқибатида вафот этган.

 

Айрим маҳаллий ОАВлар ёнғинга кондиционер компрессорининг портлаши сабаб бўлганини билдирган. Бироқ ҳодисанинг аниқ сабаби ҳозирча расман тасдиқланмаган.

 

Ёнғин ўчирилган, айни пайтда воқеа жойидаги иншоотларни демонтаж қилиш ва хавфсизлик чораларини кўриш ишлари олиб борилмоқда. Ёнғин сабабларини аниқлаш учун тергов комиссияси тузилган.

 

Ҳодиса оқибатида ҳалок бўлганлар сони бўйича турли маълумотлар тарқалмоқда. Расмий текширув якунлари ва якуний маълумотлар кутилмоқда.