Владимир Зеленский Илон Маскни “Озодлик” ордени билан тақдирлади
Мукофот унга инсон ҳаёти ва эркинлигини ҳимоя қилиш ҳамда Украина ва АҚШ ўртасидаги муносабатларни ривожлантиришдаги хизматлари учун берилди.
Украина Президенти Владимир Зеленский америкалик тадбиркор, SpaceX вa Tesla компаниялари раҳбари Илон Маскни «Озодлик» ордени билан тақдирлаш тўғрисидаги фармонни имзолади. Тегишли ҳужжат Украина Президенти расмий сайтида эълон қилинган.
Фармонга кўра, Илон Маск ушбу мукофот билан инсон ҳаёти ва эркинлигини ҳимоя қилиш ҳамда Украина ва АҚШ халқлари ўртасидаги муносабатларни ривожлантиришдаги улкан шахсий хизматлари учун тақдирланган.
«Озодлик» ордени Украинанинг энг юқори давлат мукофотларидан бири бўлиб, 2008 йилда таъсис этилган. У Украина фуқаролари ва хорижий давлат фуқароларига мамлакат суверенитети ва мустақиллигини мустаҳкамлаш, демократияни ривожлантириш, ислоҳотларни амалга ошириш ҳамда инсон ҳуқуқ ва эркинликларини ҳимоя қилишдаги алоҳида хизматлари учун берилади.
Илон Маск раҳбарлик қилаётган Starlink сунъий йўлдош алоқа тизими Россия-Украина уруши даврида Украина Қуролли Кучлари томонидан фойдаланиб келинмоқда.
Аввалроқ Маск Россия-Украина можаросининг тезроқ якунланишига умид билдирган. У Украина собиқ мудофаа вазири Михайло Федоровнинг Starlink ва Маскнинг Украинага кўрсатган технологик кўмагига оид фикрларини ҳам ижобий изоҳлаган.
«Озодлик» орденининг аввалги соҳиблари қаторида Германиянинг собиқ канцлери Ангела Меркел, Буюк Британиянинг собиқ бош вазири Борис Жонсон, Франциянинг собиқ президенти Франсуа Олланд ва АҚШнинг собиқ президенти Жо Байден каби сиёсатчилар ҳам бор.
