Жиззахда қарийб 14 кг “опий”ни сотиш ва тарқатишни режалаштирган шахслар ушланди
Уч нафар шахс Тожикистондаги наркокурерлар қолдирган наркотик моддаларни олиб, уларни сотиш орқали даромад орттиришни режалаштирган.
Давлат хавфсизлик хизмати Тошкент вилояти бўйича бошқармаси томонидан Сирдарё ва Жиззах вилоятларида гиёҳвандлик воситаларининг ноқонуний айланишига қарши тезкор тадбирлар ўтказилди.
Тадбирлар давомида Тошкент шаҳрида яшовчи, 1985 йилда туғилган, муқаддам судланган шахснинг Сирдарё туманидаги вақтинчалик яшаш хонадони кўздан кечирилган. Унда 1983 йилда туғилган Тожикистон фуқароси ҳамда Қашқадарё вилоятида яшовчи, 1962 йилда туғилган, илгари гиёҳвандлик воситалари савдоси билан боғлиқ жиноят учун судланган фуқаро ҳам борлиги аниқланган.
Суриштирувлар натижасида мазкур уч нафар шахс қўшни Тожикистондаги наркокурерлар томонидан Жиззах вилоятининг Янгиобод тумани ҳудудидаги яширин жойга қолдирилган наркотик моддаларни олиб, уларни сотиш ва тарқатиш орқали даромад орттиришни режалаштиргани маълум бўлган.
Тезкор тадбирнинг давоми сифатида яширин жой кўздан кечирилиб, у ердан умумий оғирлиги 13 килограмм 653 грамм бўлган «опий» моддаси процессуал тартибда ашёвий далил сифатида олиб қўйилган.
Мазкур ҳолат юзасидан шахсларга нисбатан жиноят иши қўзғатилган. Ҳозирда тергов ҳаракатлари олиб борилмоқда.
