11 сентябрь терактлари: Халид Шайх Муҳаммад ва уч шериги устидан суд қачон бўлиши белгиланди

 
АҚШ ҳарбий судьяси подполковник Майкл Шрама 2001 йил 11 сентябрь куни АҚШда содир этилган терактларининг бош ташкилотчиси деб айбланаётган Холид Шайх Муҳаммад ва яна уч нафар судланувчи устидан суд жараёнини 2028 йил 5 июндан бошлаш ҳақида қарор чиқарган. Иш АҚШнинг Кубадаги Гвантанамо ҳарбий базасидаги трибуналда кўриб чиқилади. Бу ҳақда Reuters хабар берди.

 
Судланувчилар қаторига Валид Муҳаммад Солиҳ Муборак бин Аташ, Мустафо Аҳмад Адам ал-Ҳавсавий ва Али Абдул Азиз Али ҳам кирган. Ҳужумлар оқибатида қарийб 3 минг киши ҳалок бўлган.

 
Суд жараёни дастлаб 2027 йил январида бошланиши таклиф қилинган. Бироқ судья Шрама бу муддат судгача бўлган далиллар ва бошқа процессуал масалаларни ҳал қилиш учун етарли эмаслигини билдирган. Шу сабабли суд бошланиши 2028 йил июнига кўчирилган.

 
Суд жараёнининг дастлабки босқичида ҳарбий хизматчилардан иборат ҳайъат танланади. Ҳайъат шакллантирилганидан 30 кун ўтиб томонларнинг кириш баёнотлари тингланиши режалаштирилган. Шундан кейин прокуратура ўз далилларини тақдим этади, мудофаа томони эса тегишли процессуал аризалар билан чиқиши мумкин. Ҳимоя томонининг асосий далилларни тақдим этиши прокуратура ишини якунлаганидан 60 кун ўтиб бошланиши белгиланган.

 
Холид Шайх Муҳаммад 2003 йилда қўлга олинган ва кейинчалик Гвантанамога олиб келинган. У 11 сентябрь ҳужумларини режалаштиришда бош ролни ўйнаганликда айбланган. Узоқ давом этган судгача бўлган жараёнлар сабаб иш бўйича суд бошланиши бир неча бор ортга сурилган.

 
Иш бўйича судланувчилардан айримлари ўлим жазосидан қутулиш имконини берадиган айбни тан олиш келишувига рози бўлган эди. Бироқ АҚШнинг собиқ мудофаа вазири Ллойд Остин келишувни бекор қилган. 2026 йил июлида апелляция суди ҳам Муҳаммад ва яна икки судланувчига мазкур келишувлар доирасида айбини тан олишга рухсат бермаган.