264 нафар шахс Ўзбекистон фуқаролигига қабул қилинди
Уларнинг 90 нафари Сурхондарёда истиқомат қилади.
Шавкат Мирзиёев томонидан мамлакат мустақиллигининг 35 йиллиги арафасида 264 нафар шахсни Ўзбекистон фуқаролигига қабул қилиш тўғрисидаги фармон имзоланди. Бу ҳақда “Ўзбекистон 24” телеканалида маълум қилинди.
Фуқароликка қабул қилинганлар орасида узоқ йиллар давомида Ўзбекистонда яшаб келган, бироқ фуқаролик мақомига эга бўлмаган шахслар ҳам бор.
Улар орасида Тожикистонда туғилган ва 26 йилдан буён Тошкент вилоятида яшаб келаётган Хурсаной Жумабоева ҳамда Ўзбекистон фуқаролигини 40 йил кутган Робия Қаҳҳорова бор.
Фуқароликни қўлга киритган Отабек Расулов эса бу хабарни катта қувонч билан кутиб олганини таъкидлаган.
Қайд этилишича, фуқароликка қабул қилинган 264 нафар шахснинг 90 нафари Сурхондарё вилоятида истиқомат қилади.
Маълумотларга кўра, Ўзбекистон мустақилликка эришганидан кейин 1991–2007 йилларда 482 нафар фуқаролиги бўлмаган шахс Ўзбекистон фуқаролигига қабул қилинган. 2007–2016 йилларда эса фуқароликка қабул қилиш ҳолатлари қайд этилмаган.
