Непалдаги сув тошқинларида ҳалок бўлганлар орасида ўзбекистонликлар йўқ
Ўзбекистоннинг Деҳлидаги элчихонаси тегишли идоралар билан доимий алоқада бўлиб, вазият ривожини мунтазам кузатиб бораётганини маълум қилди.
Непал ва Тибетдаги сув тошқинлари оқибатида ҳалок бўлганлар орасида Ўзбекистон фуқаролари йўқ. Бу ҳақда “Дунё” ахборот агентлиги хабар берди.
Қайд этилишича, Ўзбекистоннинг Деҳлидаги (айни пайтда Непалда ҳам фаолият юритади) элчихонаси ҳозирги вақтда фалокат оқибатида ҳалок бўлганлар ва жабрланганлар орасида ўзбекистонликлар борлиги тўғрисида маълумот келиб тушмаганини билдирган. Дипломатик ваколатхона тегишли идоралар билан доимий алоқада бўлиб, вазият ривожини мунтазам кузатиб бормоқда.
Reuters’га кўра, табиий офат оқибатида Непалда камида 165 киши ҳалок бўлган, 826 киши бедарак йўқолган. Бедарак йўқолганлар орасида 500 га яқин хорижлик бор.
Тибетнинг Жирўнг ҳудудида эса 558 киши, жумладан, 260 нафар хорижлик бедарак йўқолган. Хитой расмийларига кўра, ҳудудда уч киши ҳалок бўлган. Ҳозирда Непал ва Тибетда қидирув-қутқарув ишлари давом этмоқда.
