Қозоғистонда 16 ёшгача бўлган болалар учун ижтимоий тармоқларга чеклов киритилиши мумкин
Тоқаев 16 ёшгача бўлган болаларнинг ижтимоий тармоқларда рўйхатдан ўтишини тақиқлаш масаласини кўриб чиқишни таклиф қилди.
Қозоғистон Президенти Қосим-Жомарт Тоқаев 16 ёшгача бўлган болаларнинг ижтимоий тармоқларда рўйхатдан ўтишини тақиқлаш масаласини кўриб чиқишни таклиф қилди. Бу ҳақда Tengrinews.kz Акорда матбуот хизматига таяниб хабар берди.
Давлат раҳбари бу таклифни Остонада ўтказилган ўқитувчиларнинг август конференциясида илгари сурган.
Тоқаевнинг таъкидлашича, бугунги кунда ижтимоий тармоқлар, рақамли платформалар, сунъий интеллект ва агрессив маркетинг болаларнинг дунёқарашига оила ва мактаб билан бир қаторда сезиларли таъсир кўрсатмоқда. Шу сабабли ёш авлоднинг психологик фаровонлиги, ҳиссий барқарорлиги ва ахлоқий тарбиясини таъминлаш муҳим вазифалардан бирига айланган.
Президент 2018 йилда қабул қилинган болаларни соғлиғи ва ривожланишига зарарли ахборотдан ҳимоя қилишга қаратилган қонунчиликни бугунги шароитдан келиб чиқиб қайта кўриб чиқиш зарурлигини таъкидлаган.
Унинг қайд этишича, ҳукумат 16 ёшгача бўлган фойдаланувчиларнинг ижтимоий тармоқларда рўйхатдан ўтишини тақиқлашни назарда тутувчи қонун лойиҳасини ишлаб чиққан ва ҳужжат июнь ойида Парламентга тақдим этилган.
Тоқаев депутатларга мазкур масалани Парламентнинг янги сессияси доирасида кўриб чиқишни таклиф қилган.
Президент бундай чекловларни жорий этиш бўйича қатор ривожланган давлатларда ҳам тегишли чоралар кўрилаётганини қайд этган.
