Самарқандда энага қаровида бўлган 3 ёшли бола электр плитага ўтқазилгани айтилмоқда
Гувоҳлар болага нисбатан шафқатсиз муносабатда бўлингани, жумладан, қизиган электр плитага ўтқазилгани, қўллари сим билан боғлангани ва бир неча кун овқатлантирилмаганини айтмоқда.
Самарқанд вилояти Каттақўрғон туманида энага қаровида бўлган 3 ёшли бола зўравонликка учрагани айтилмоқда. Воқеадан хабар топган қўшнилар ҳуқуқни муҳофаза қилувчи органларга мурожаат қилган. Шундан сўнг бола шифохонага олиб борилган.
Маълум бўлишича, боланинг онаси қарийб икки ой давомида фарзандини энага қаровига қолдириб, ишлаган. Оила асли Нарпай туманидан бўлган боланинг отаси хорижда меҳнат қилаётгани, онаси эса оилавий шароити сабаб Каттақўрғонда ишлаган.
Боланинг яқинлари ва гувоҳларнинг сўзларига кўра, энага унга нисбатан шафқатсиз муносабатда бўлган. Жумладан, боланинг қўллари сим билан боғлангани ва қизиган электр плитага ўтқазилгани иддао қилинмоқда.
Шифокорлар боланинг танасида куйиш, кўкариш ва бошқа жароҳатлар аниқланганини билдирган. Шунингдек, у бир неча кун давомида овқатлантирилмагани сабаб озиб кетгани ва гемоглобин даражаси пасайгани айтилмоқда.
Шифохона маълумотига кўра, боланинг думба-сон соҳасидаги оғир куйишлари сабаб жарроҳлик амалиёти ўтказилиб, тери кўчириш муолажаси бажарилган. Бўйин ва кўз ости соҳаларида ҳам кўкаришлар аниқланган. Ҳозирда боланинг аҳволи қониқарли экани маълум қилинган.
Гувоҳлардан бири ушбу энага аввал ҳам бошқа болаларга қарагани ва унинг телефонида болаларга нисбатан зўравонлик акс этган видеолар бўлиши мумкинлигини айтган. Шунингдек, бошқа болаларга ҳам шафқатсиз муносабатда бўлингани ҳақидаги маълумотлар билдирилган.
Боланинг яқинлари воқеага ҳуқуқий баҳо берилишини ҳамда айбдор шахслар аниқланиб, қонуний чора кўрилишини кутмоқда.
Болалар омбудсмани мазкур ҳолатни ўз назоратига олган. Омбудсманнинг Самарқанд вилоятидаги ҳудудий вакили вазиятни ўрганишни бошлаган.
Ҳозирда ҳолат юзасидан Ички ишлар органлари томонидан тегишли ишлар олиб борилмоқда. Воқеанинг барча тафсилотлари, боланинг жароҳатланишига сабаб бўлган ҳолатлар ва масъул шахсларнинг ҳаракатларига тергов натижаларига кўра ҳуқуқий баҳо берилади.
