Тошкентдаги олийгоҳларда дарслар 08:00 да бошланади
Тартиб транспорт оқимини мақбуллаштириш ва тиғиз вақтлардаги юкламани камайтиришга қаратилган.
2026/2027-ўқув йилидан бошлаб Тошкент шаҳрида жойлашган олий таълим ташкилотларида биринчи сменадаги дарс машғулотлари соат 08:00 да бошланади. Бу ҳақда Олий таълим, фан ва инновациялар вазирлиги матбуот хизмати хабар берди.
Мазкур тартиб пойтахтдаги транспорт оқимини самарали ташкил этиш, эрталабки ва кечки тиғиз вақтларда йўллардаги юкламани камайтириш ҳамда таълим жараёнини мақбул ташкил этишга қаратилган.
Дарсларнинг эртароқ бошланиши талабалар ва профессор-ўқитувчиларнинг ҳаракатланиш вақтини оқилона режалаштириш, ўқув жараёнини кун давомида самарали ташкил этиш ҳамда шаҳардаги транспорт оқимини мақбуллаштиришга хизмат қилади.
Шунингдек, янги тартиб кундузги ва кечки таълим шаклида таҳсил олаётган талабалар учун ўқув кунини тўғри режалаштириш ва машғулотлардан ташқари ўқув фаолияти учун вақт имкониятларини кенгайтириши мумкин.
Янги ўқув йилига тайёргарлик доирасида Тошкент шаҳридаги олий таълим ташкилотлари раҳбарлари, профессор-ўқитувчилар ва талабалар мазкур тартибни инобатга олишлари сўралди.
Таълим ташкилотларида машғулотларни белгиланган вақтда бошлаш ва ўқув жараёнини тегишли равишда ташкил этиш бўйича зарур чоралар кўрилади.
Тартиб фақат Тошкент шаҳридаги олий таълим ташкилотларининг биринчи сменасидаги ўқув машғулотларига тааллуқли.
