Байрам кунлари шифохоналар ва “103” хизмати узлуксиз ишлайди — ССВ
Шифохоналар, ихтисослаштирилган тиббиёт марказлари, туғруқ ва болалар муассасалари навбатчилик асосида фаолият юритади.
Мустақиллик байрами муносабати билан 29 август – 1 сентябрь кунлари мамлакатимизда тиббий хизматлар узлуксиз ташкил этилади.
Соғлиқни сақлаш вазирлигида байрам ва дам олиш кунларида тиббиёт муассасалари фаолиятини мувофиқлаштириш мақсадида алоҳида штаб ташкил этилди.
Мазкур кунларда туман ва шаҳар, вилоят ҳамда республика миқёсидаги шифохоналар, ихтисослаштирилган тиббиёт марказлари, тиббиёт олий таълим муассасалари клиникалари ҳамда 39 та туманлараро қўшма шикастланиш ва ўткир қон-томир касалликлари марказларида навбатчилик асосида тиббий хизмат кўрсатилади.
Шунингдек, Республика шошилинч тиббий ёрдам илмий маркази ва унинг 13 та ҳудудий филиали, шунингдек, қарийб 200 та шошилинч тиббий ёрдам бўлимида навбатчи шифокор ва ҳамширалар 24 соат давомида фаолият юритади.
29 август – 1 сентябрь саналарида «103» тез тиббий ёрдам хизмати ҳам байрам кунларида одатий тартибда ишлайди. Тизимнинг 14 та ҳудудий филиали, 189 та станцияси, 40 та подстанцияси ва 1 492 та таянч пунктида 2 900 дан зиёд тиббий ёрдам бригадаси чақирувларга доимий шай ҳолатда бўлади.
Бундан ташқари, мамлакатдаги барча туғруқ ва болалар даволаш муассасалари ҳам байрам кунлари узлуксиз фаолият юритади.
