Ҳиндистон Ўзбекистонга 500 минг долларлик тиббий ускуналар берди
Ҳарбий хавфсизлик ва мудофаа университети поликлиникаси Ҳиндистоннинг беғараз ёрдами доирасида 70 та замонавий тиббий ускуна, жумладан, реанимобил ва диагностика қурилмалари билан жиҳозланди.
Ўзбекистон мустақиллигининг 35 йиллиги арафасида Ҳарбий хавфсизлик ва мудофаа университети поликлиникаси Ҳиндистон ҳукумати томонидан беғараз ёрдам сифатида тақдим этилган замонавий тиббий техника ва ускуналар билан жиҳозланиб, фойдаланишга топширилди. Бу ҳақда Дунё ахборот агентлиги хабар берди.
Тантанали очилиш маросимида Ҳарбий хавфсизлик ва мудофаа университети бошлиғининг биринчи ўринбосари, генерал-майор Фарҳоджон Шерматов, Ҳиндистоннинг Ўзбекистондаги элчиси Смита Пант, ҳарбий хизматчилар ва фахрийлар иштирок этди.
Тадбир доирасида Ҳиндистон ҳукумати томонидан Ўзбекистон Мудофаа вазирлигининг ҳарбий госпиталлари учун тақдим этилган замонавий диагностика ва даволаш ускуналари, ихтисослаштирилган реанимация машинаси ҳамда тўртта травма ускуналари тўплами расман топширилди.
Поликлиникани модернизация қилиш доирасида умумий қиймати 500 минг доллар бўлган 70 та замонавий тиббий ускунанинг 49 таси ушбу муассасага етказиб берилди. Улар орасида рақамли рентгенография қурилмаси, Холтер мониторинги, циклоэргометр, ультратовуш аппарати, замонавий стоматологик ва физиотерапия ускуналари мавжуд.
Янги тиббий имкониятлар ҳарбий хизматчилар, курсантлар ва уларнинг оила аъзоларига кўрсатиладиган тиббий хизмат сифатини ошириш, касалликларни эрта аниқлаш ва самарали даволашга хизмат қилади. Реанимобилнинг фойдаланишга топширилиши эса шошилинч тиббий ёрдам кўрсатиш имкониятларини янада кенгайтиради.
Ўзбекистон ва Ҳиндистон ўртасидаги ҳарбий таълим ва тиббиёт соҳаларидаги ҳамкорлик изчил ривожланиб бормоқда. Аввалроқ Ҳиндистон кўмагида университетда ахборот технологиялари ва киберхавфсизлик лаборатория мажмуаси ташкил этилган. Шунингдек, ҳиндистонлик мутахассислар курсантлар ва офицерларни тайёрлаш жараёнида фаол иштирок этмоқда.
Маросимда Ҳиндистон ҳукуматига ҳарбий-тиббий ҳамкорликни ривожлантиришга қўшаётган ҳиссаси учун миннатдорлик билдирилди. Мудофаа соҳасидаги ҳамкорликни мустаҳкамлашда фаол иштирок этган ҳиндистонлик мутахассислар Мудофаа вазирлигининг “Жанговар ҳамдўстликни мустаҳкамлашдаги хизматлари учун” кўкрак нишони ва эсдалик совғалари билан тақдирланди.
Тадбир якунида меҳмонлар поликлиникада яратилган замонавий шароитлар ва янги тиббий имкониятлар билан танишди.
