Испанияда 3 минг йиллик хазина тўрт дақиқада ўғирлаб кетилди
Ўғирланган олтин буюмларнинг қиймати камида 1,7 миллион еврога баҳоланмоқда.
Испаниянинг Аликанте провинциясидаги Виллена археология музейидан бронза даврига оид “Виллена хазинаси”нинг катта қисми ўғирлаб кетилди. Дастлабки баҳоларга кўра, ўғирланган олтин буюмларнинг қиймати камида 1,7 миллион еврони ташкил этади. Бу ҳақда El Pais хабар берди.
Воқеа пайшанба куни эрта тонгда содир бўлган. Ўғрилар жиноятни тўрт дақиқадан камроқ вақт ичида амалга оширган.
“Виллена хазинаси” милоддан аввалги тахминан 1000 йилларга оид бўлиб, 50 дан ортиқ заргарлик буюмлари ва олтин, кумуш, темир ҳамда кеҳрибардан тайёрланган бошқа қадимий артефактларни ўз ичига олади. Хазина 1960 йилларда Виллена шаҳри ҳудудидан топилган ва шундан буён маҳаллий археология музейида сақланиб келган.
Мазкур коллекция Европадаги бронза даврига оид энг йирик олтин буюмлар тўпламларидан бири ҳисобланади.
Виллена мери Фулгенсио Сердан ҳодисадан қаттиқ изтиробда эканини билдириб, хазина шаҳар аҳолиси учун катта тарихий ва маданий аҳамиятга эга эканини таъкидлади.
Унинг сўзларига кўра, жиноятчилар коллекциядаги деярли барча олтин буюмларни олиб кетган. Бироқ кумуш идишлар, билагузук ва айрим бошқа артефактлар жойида қолган. Кейинчалик музейдан яна учта олтин ва кумуш буюм ҳам йўқолгани аниқланган.
Мери ўғирланган буюмларнинг қиймати камида 1,7 миллион евро деб баҳоланаётганини, бу фақат металларнинг қиймати эканини, артефактларнинг тарихий ва маданий қиймати бундан анча юқори эканини қайд этди.
Дастлабки маълумотларга кўра, жиноятчилар ўғирликдан аввал чалғитувчи тактикадан фойдаланган. Соат 05:16 да шаҳар четидаги спорт марказида сигнал ишга тушган ва ҳуқуқ-тартибот ходимлари воқеа жойига йўл олган. Орадан тўрт дақиқа ўтиб, 05:20 да музей сигнализацияси ишга тушган. Полиция соат 05:24 да етиб келганида, жиноятчилар аллақачон бинони тарк этган бўлган.
Видеокузатув камераларида музейга икки транспорт воситасида яқинлашган бир неча киши қайд этилган.
Ҳозирда Испания ҳуқуқ-тартибот идоралари томонидан ўғирлик юзасидан тергов олиб борилмоқда.
