Мустақилликнинг 35 йиллигига бағишланган олтин ва кумуш тангалар сотувга чиқарилди
Марказий банк томонидан чиқарилган коллекция учта тангадан иборат бўлиб, уларнинг ҳар бири 31,1 грамм оғирликда ва 100 минг сўм номинал қийматга эга.
Ўзбекистон Марказий банки мамлакат мустақиллигининг 35 йиллигига бағишланган эсдалик олтин ва кумуш тангалар коллекциясини сотувга чиқарди. Бу ҳақда Марказий банк матбуот хизмати хабар берди.
Учта тангадан иборат коллекция Ўзбекистоннинг миллий давлатчилиги, тарихий мероси, миллий қадриятлари ва замонавий тараққиёт ғояларини ягона бадиий концепцияда акс эттирган.
Коллекциянинг биринчи тангасида Мустақиллик монументи, иккинчисида Тошкент шаҳридаги Ислом цивилизацияси маркази, учинчи тангасида эса мустақилликнинг 35 йиллигини ифодаловчи «35» рақами тасвирланган.
Тангалар 999,9 асилликдаги олтин ва кумушдан тайёрланган бўлиб, ҳар бирининг оғирлиги 31,1 грамм, номинал қиймати 100 минг сўмни ташкил этади. Улар уч доналик коллекция шаклида ёки алоҳида ҳолда сотилади.
Олтин тангаларнинг дастлабки тиражи 450 дона, кумуш тангаларники эса 800 дона этиб белгиланган. Заруратга кўра, тангалар тиражи оширилиши мумкин.
Эсдалик тангалари 27 августдан бошлаб тижорат банклари филиалларида сотувга чиқарилган. Уларнинг сотув нархлари ҳамда мавжудлиги ҳақидаги маълумотлар Марказий банкнинг расмий веб-сайтида мунтазам эълон қилиб борилади.
