Непал ва Хитой чегарасидаги тошқинларда ҳалок бўлганлар сони 600 нафарга яқинлашди
Минглаб одамлар бедарак йўқолган. Қутқарув ишлари ҳудуддаги хавф камайганидан сўнг қайта бошланди.
Непал ва Хитой чегарасида қисқа вақтга тўхтатилган қутқарув операциялари қайта бошланди. Ҳудудда кўлнинг тошиб кетиши билан боғлиқ хавф камайди.
Reuters хабарига кўра, музлик қулаши натижасида юзага келган кучли оқим Непалда 579 кишининг, Хитойнинг Тибет ҳудудида эса 5 кишининг ҳаётига зомин бўлган. Непалда 1 924 киши, Тибетнинг Жирўнг округида эса 558 киши бедарак йўқолган. Уларнинг 260 нафари хориж фуқаролари.
Қизил Хоч табиий офатдан 90 мингдан ортиқ киши зарар кўрганини билдирди.
Тошқин оқибатида ҳосил бўлган кўл Ленде Ҳола ва Тришули дарёларига тоша бошлагач, Непалда қутқарув ишлари қарийб уч соатга тўхтатилган. Хавф камайгач, операциялар қайта тикланган. Бироқ расмийлар ҳудуддаги иккита тўсиқ кўли тўлиқ қуримагунча тошқин хавфи сақланиб қолишидан огоҳлантирмоқда.
Шунингдек, Ҳиндистоннинг Уттар-Прадеш штатида Непал томондан оқиб келадиган дарёлардан 10 кишининг жасади топилган.
Бир қатор давлатлар Непалга қидирув-қутқарув ёрдамини таклиф қилган бўлса-да, мамлакат ҳукумати ҳозирча хорижий гуруҳлар ёрдамига эҳтиёж йўқлигини маълум қилган. Ҳиндистон, Хитой, АҚШ, Буюк Британия, Япония, Жанубий Корея, Шри-Ланка ва Бангладеш ўз қутқарув гуруҳларини юборишга тайёрлигини билдирган.
