Президент: “Биз бугун кечагидан кучлимиз. Насиб этса эртага бундан ҳам кучли бўламиз”
Президент Шавкат Мирзиёев Мустақилликнинг 35 йиллигига бағишланган нутқида халқни бирлик ва ҳамжиҳатликка чорлади.
Президент Шавкат Мирзиёев Ўзбекистон давлат мустақиллигининг 35 йиллигига бағишланган тантанали маросимдаги нутқини мамлакат келажагига ишонч ва халқни бирликка чорловчи фикрлар билан якунлади.
Давлат раҳбари 35 йиллик мустақил тараққиёт халқ ва давлат ягона мақсад йўлида бирлашиб, астойдил ҳаракат қилса, эришиб бўлмайдиган марралар йўқлигини кўрсатганини таъкидлади.
“Биз бугун кечагидан кучлимиз. Насиб этса, эртага бундан ҳам кучли бўламиз!” — деди Президент.
Шавкат Мирзиёев ягона Ватан ва ягона халқ бўлиб, янги ҳаёт ҳамда буюк келажакни биргаликда барпо этишга чақирди.
Президент матонатли, мард ва олийжаноб халқ ўз олдига қўйган улуғ мақсадларга албатта етишига ишонч билдирди.
Давлат раҳбари нутқининг якунида Ўзбекистоннинг янги буюк тарихини халқ билан биргаликда яратишига ишонч билдирди ва юртда тинчлик, хонадонларда ободлик ва фаровонлик бўлишини тилади.
Шунингдек, Президент халқни Ўзбекистон Республикаси давлат мустақиллигининг 35 йиллиги билан яна бир бор табриклади.
