Президент Мустақиллик монументига гулчамбар қўйди
“Янги Ўзбекистон” боғида Мустақилликнинг 35 йиллигига бағишланган маросим бўлиб ўтди.
Президент Шавкат Мирзиёев “Янги Ўзбекистон” боғида бўлиб, Мустақиллик монументи пойига гулчамбар қўйди.
Мустақиллик монументида халқимизнинг кўп асрлик тарихи, буюк алломаларимиз ва жаҳонгир аждодларимиз сиймолари, шунингдек, юртимиз тараққиётидаги муҳим тарихий воқеалар ўз ифодасини топган.
Монумент чўққисида акс эттирилган Ҳумо қуши эса озодлик ва эзгулик ғоялари, халқимизнинг эзгу орзу-интилишлари рамзи сифатида гавдаланади.
Ўзбекистон мустақиллигининг 35 йиллиги муносабати билан ташкил этилган тантанали маросимда Олий Мажлис Қонунчилик палатаси ва Сенати, Президент Администрацияси, Вазирлар Маҳкамаси ҳамда Тошкент шаҳар жамоатчилиги вакиллари иштирок этди.
