Сиэтл 1 сентябрни "Ўзбекистон Мустақиллиги куни" деб эълон қилди
Қарор Ўзбекистон мустақиллигининг 35 йиллиги муносабати билан қабул қилинган бўлиб, шаҳарда Ўзбекистоннинг Бош консулхонаси фаолият юритаётгани ҳам ҳужжатда алоҳида қайд этилган.
АҚШнинг йирик иқтисодий ва технологик марказларидан бири бўлган Сиэтл шаҳри мэри Кэти Б. Уилсон 2026 йил 1 сентябрни шаҳарда расман “Ўзбекистон Мустақиллиги куни” деб эълон қилган. Тегишли қарор Ўзбекистон давлат мустақиллигининг 35 йиллиги муносабати билан қабул қилинган.
Сиэтл мэри томонидан имзоланган расмий прокламацияда Ўзбекистон 35 йил давомида суверенитет, тараққиёт ва кенг кўламли трансформация йўлидан ўтгани таъкидланган. Ҳужжатда Ўзбекистоннинг Сиэтлда Бош консулхонаси фаолиятини йўлга қўйгани ҳам қайд этилган. Шу сабабли Сиэтл Ўзбекистоннинг бевосита дипломатик ваколатхонаси мавжуд бўлган АҚШнинг саноқли шаҳарларидан бирига айлангани кўрсатилган.
Прокламацияда Ўзбекистон Марказий Осиёнинг энг кўп аҳолига эга давлати ва минтақанинг жадал ривожланаётган иқтисодиётларидан бири сифатида қайд этилган. Мамлакат очиқ бозорлар ва халқаро шерикликни кенгайтиришга интилаётгани таъкидланган.
Ҳужжатда Ўзбекистоннинг қадимий Ипак йўли марказида жойлашгани ва бугунги кунда 100 миллиондан ортиқ истеъмолчига эга минтақага чиқиш имконини берувчи стратегик дарвоза сифатидаги ўрни ҳам қайд этилган. Сиэтлнинг бизнес ҳамжамияти билан савдо, инвестиция, логистика, технологиялар ва энергетика соҳаларида ҳамкорлик қилиш учун катта имкониятлар мавжудлиги кўрсатилган.
Сиэтл мэри Ўзбекистон Бош консулхонаси фаолияти икки томон ўртасидаги узоқ муддатли инсонлараро, бизнес ва ҳукуматлараро алоқаларни мустаҳкамлашга хизмат қилишини билдирган.
Ўзбекистоннинг Сиэтлдаги бош консули Ахрор Бурханов Сиэтл шаҳрининг ушбу қарорини икки халқ ўртасидаги дўстлик ва кенгайиб бораётган шерикликнинг муҳим рамзи сифатида баҳолаган. У қарор Ўзбекистон мустақиллигининг 35 йиллигига ҳурмат билан бирга, Ўзбекистон ва АҚШнинг Тинч океани шимоли-ғарбий минтақаси ўртасида шаклланаётган янги муносабатларнинг ифодаси эканини айтган.
Бурханов Сиэтлда Бош консулхона очилиши билан икки томон ўртасидаги алоқаларни иқтисодий, технологик, таълимий ва маданий лойиҳаларга айлантириш мақсад қилинганини билдирган.
Шунингдек, 4 сентябрь куни Сиэтлда Ўзбекистоннинг АҚШ Ғарбий соҳилидаги биринчи Бош консулхонасининг расмий очилиш маросими бўлиб ўтиши режалаштирилган. Ўзбекистон мустақиллигининг 35 йиллигига бағишланадиган тадбирда Вашингтон штати ва Сиэтл шаҳри раҳбарияти, дипломатик корпус, йирик АҚШ компаниялари, академик доиралар ва жамоатчилик вакиллари иштирок этиши кутилган.
Маълумот учун, Сиэтл шаҳри Тинч океани шимоли-ғарбий минтақасининг йирик иқтисодий, технологик ва савдо марказларидан бири ҳисобланади. Катта Сиэтл минтақасида 4,1 миллиондан ортиқ киши яшайди, унинг иқтисодиёти 2025 йилда қарийб 607 миллиард доллар ҳажмида ялпи ҳудудий маҳсулот яратган.
Минтақада Amazon ва Starbucks бош қароргоҳлари, шунингдек, Microsoft, Costco Wholesale, T-Mobile ва PACCAR каби йирик компаниялар жойлашган. Boeing, Google, Meta, Expedia Group ва Alaska Airlines каби глобал компаниялар ҳам Катта Сиэтлда фаолият юритади.
