Урушнинг давом этиши минтақа ва дунёга зарар етказади — Пезешкиан
Эрон президенти АҚШнинг Эронга қарши ҳарбий ҳаракатларни қайта бошлаши салбий оқибатларга олиб келиши мумкинлигини айтди.
Эрон президенти Масуд Пезешкиан АҚШнинг Эронга қарши ҳарбий ҳаракатларни қайта бошлаши мамлакат, минтақа ва бутун дунё учун салбий оқибатларга олиб келишини таъкидлади.
Пезешкиан бу ҳақда Қатар бош вазири ва ташқи ишлар вазири Муҳаммад бин Абдулраҳмон Ол Соний билан учрашувда маълум қилди.
Эрон раҳбарининг қайд этишича, мавжуд муаммоларни ҳарбий куч ёки босим орқали эмас, мулоқот ва дипломатик йўл билан ҳал қилиш лозим.
“Уруш Эронга мажбуран юклатилган ва унинг давом этиши мамлакатга, минтақага ва дунёга зарар етказади. Ақл-идрок меморандумни амалга оширишни қайта бошлашимиз ва муаммоларни уруш ёки куч кўрсатиш орқали эмас, балки мулоқот орқали ҳал қилишимиз кераклигини тақозо этади”, — деган Пезешкиан.
Унинг таъкидлашича, Теҳрон можаро ёки урушни авж олдиришга интилмайди. Пезешкиан, шунингдек, Эрон ва Қатар ўртасидаги дўстона муносабатлар давом этишига ишонч билдирган.
