АҚШда “Қиёмат куни” махсус ҳарбий гуруҳи тузилди
Бўлинма инқирозли вазиятларда юқори мартабали амалдорларни хавфсиз эвакуация қилиш учун хизмат қилади.
АҚШ Ҳарбий-ҳаво кучлари Вашингтон ҳудудида ҳукуматнинг узлуксиз фаолиятини таъминлашга мўлжалланган янги вертолёт эскадрильясини ташкил этди. Бу ҳақда Эндрюс авиабазаси матбуот хизмати маълум қилди.
Маълумотларга кўра, 24-вертолёт эскадрильяси Миллий пойтахт минтақасида фавқулодда вазиятларда ҳукумат фаолиятининг узлуксизлигини таъминлаш миссияларини қўллаб-қувватлайди.
Янги бўлинма глобал инқироз, жумладан, ядровий можаро каби фавқулодда вазиятларда юқори мартабали ҳукумат амалдорлари ва ҳарбий хизматчиларни хавфсиз ҳудудларга тезкор эвакуация қилиш вазифаларини бажаради.
Эскадрилья замонавий HH-60W Jolly Green II вертолётлари билан жиҳозланади. Ушбу техника бир неча ўн йиллар давомида фойдаланилган UH-1N Huey вертолётларини босқичма-босқич алмаштириши кўзда тутилган.
Янги бўлинма Вашингтон яқинидаги Эндрюс авиабазасида жойлаштирилади. Унинг ташкил этилиши АҚШ ҳукуматининг инқирозли вазиятларда бошқарувнинг узлуксизлигини таъминлаш бўйича мавжуд режаларининг бир қисми ҳисобланади.
АҚШ Ҳарбий-ҳаво кучлари ҳукуматнинг узлуксиз фаолиятини таъминлаш билан боғлиқ бошқа лойиҳаларни ҳам амалга оширмоқда. Хусусан, келажакда фойдаланиш учун янги махсус самолётларни яратиш бўйича маблағ сўралгани ҳақида ҳам хабар берилган.
ОАВ маълумотларига кўра, аввалроқ АҚШ ҳарбийлари юқори мартабали ҳукумат амалдорларини фавқулодда вазиятларда эвакуация қилиш бўйича ўқув машғулотларини ҳам ўтказган.
