“Бундай одамларга раҳм-шафқат бўлмайди” — Жапаров
Қирғизистон президенти жамиятда беқарорлик келтириб чиқаришга уринаётган шахсларга нисбатан қатъий чоралар кўрилишини айтди.
Садир Жапаров мамлакатдаги вазиятни беқарорлаштиришга уринаётган шахслар қаттиқ жазоланишини маълум қилди.
Давлат раҳбари бу ҳақда Шанхай ҳамкорлик ташкилоти саммити ва Жаҳон кўчманчилар ўйинлари вақтида хавфсизликни таъминлашга масъул куч тузилмалари фаолиятини кўздан кечириш чоғида айтган.
Жапаров хавфсизлик идораларини модернизация қилиш, уларнинг моддий-техник базасини мустаҳкамлаш, ходимлар иш ҳақини ошириш ва ижтимоий қўллаб-қувватлаш чораларини кенгайтириш бўйича ишлар амалга оширилаётганини таъкидлаган.
Президент мамлакат хавфсизлигини таъминлаш Қирғизистоннинг барқарорлиги ва тараққиётининг муҳим шарти эканини қайд этиб, ҳуқуқни муҳофаза қилувчи органлар ходимларини профессионаллик, масъулият ва халққа виждонан хизмат қилишга чақирган.
“Ривожланишнинг биринчи ва энг муҳим шарти — темир интизом”, деган Жапаров.
Унинг таъкидлашича, ташқи кучлар таъсирида жамиятда беқарорлик келтириб чиқаришга, қасос олишга чақиришга ёки мамлакатдаги вазиятни издан чиқаришга уринаётган шахсларга нисбатан қатъий чоралар кўрилади.
“Бундай одамларга раҳм-шафқат бўлмайди”, дея таъкидлаган Қирғизистон президенти.
Жапаров мамлакат кучи халқнинг бирлик ва ҳамжиҳатлигида эканини таъкидлаб, жамиятдаги тотувлик барқарорлик ва фаровонликнинг муҳим омили эканини қайд этган.
