Исроил Ғазодаги тиббий буюмлар сақланадиган омборга зарба берди

Исроилнинг Ғазо сектори бўйлаб уюштирган ҳужумларида камида икки киши ҳалок бўлди, 18 киши жароҳатланди. Бу ҳақда Al Jazeera хабар берди.

 

Шунингдек, Дайр ал-Балаҳ шаҳридаги шифохона мажмуасида тиббий буюмлар омбори сифатида фойдаланилган чодирга берилган зарба оқибатида уч киши яраланган.

 

Шанба куни Исроил дрони Ал-Ақсо шаҳидлари шифохонаси ҳудудидаги тиббий буюмлар омборига зарба берган. Шифохона директори уч киши жароҳатланганини билдирган. Исроил ҳарбийлари зарбани тасдиқлаб, ҳужум вақтида ҲАМАС қўмондони нишонга олинганини маълум қилган, бироқ бу даъвони тасдиқловчи далил келтирмаган.

 

Ғазо шаҳридаги Тал ал-Ҳаво маҳалласида ҳам Исроил дрони велосипедга зарба берган. Фаластиннинг Wafa агентлиги хабарига кўра, ҳужумда бир киши ҳалок бўлган, икки киши жароҳатланган. Яна бир киши Дайр ал-Балаҳ шарқидаги ал-Мусаддар қишлоғида Исроил аскарларининг ўқ узиши оқибатида ҳалок бўлган.

 

Бундан ташқари, Исроил квадрокоптери Ғазонинг шимолидаги Камол Адван шифохонаси яқинига портловчи мослама ташлаган.

 

Ғазо Соғлиқни сақлаш вазирлиги сўнгги 48 соат ичида тўққиз нафар янги ҳалок бўлган ва вайроналар остидан топилган бир кишининг жасади, шунингдек, 18 нафар ярадор олиб келинганини маълум қилди.

 

Вазирликка кўра, бошқа қурбонлар вайроналар остида ёки тез ёрдам ва фуқаро муҳофазаси ходимлари етиб бора олмаётган ҳудудларда қолиб кетган.

 

Вазирлик маълумотига кўра, ўтган йил октябрда Исроил ва ҲАМАС ўртасидаги “ўт очишни тўхтатиш” кучга кирганидан буён Исроил ҳужумлари оқибатида 1313 нафар фаластинлик ҳалок бўлган.

 

Сўнгги кунларда Исроил Ғазо бўйлаб ҳужумларини кучайтирган. Бу ҳужумлар “ўт очишни тўхтатиш” келишувига қарамай давом этмоқда.