“Калмар ўйини” таъсиридаги икки ўсмир 12 ёшли болани ўлдирди
Қотилликда гумонланиб қўлга олинган ўсмир қизларнинг ёнидан 50 кишининг исми киритилган рўйхат топилган.
Россиянинг Москва вилоятида 12 ёшли мактаб ўқувчиси ўлдирилди. Қотилликда 15 ва 16 ёшли икки нафар ўсмир қиз гумонланиб, улар қўлга олинган. Meduza хабарига кўра, қизлар жиноятни Жанубий Кореянинг “Кальмар ўйини” сериалидан таъсирланган ҳолда содир этган бўлиши мумкин.
12 ёшли бола 26 август куни Кабаново қишлоғида бедарак йўқолган. Уни қидиришга кўнгиллилар ҳам жалб этилган. Эртаси куни унинг жасади кўплаб пичоқ жароҳатлари билан ташландиқ бинонинг ертўласидан топилган. Мазкур бино илгари маҳаллий касб-ҳунар билим юрти ётоқхонаси бўлган.
Кўп ўтмай, жиноятни содир этишда гумонланиб, 15 ва 16 ёшли икки қиз қўлга олинган. Терговчилар қотиллик бўйича жиноят иши қўзғатган.
ОАВ ва Телеграм-каналлар ҳуқуқ-тартибот идораларидаги манбаларга таяниб, қизлар қотилликни олдиндан режалаштиргани ҳақида хабар бермоқда. Улар пичоқлар ва қўлқопларни олдиндан тайёрлаган. Қизлар болани бир қишлоқда яшайдиган қўшниси сифатида таниган.
Бола йўқолган куни улар уни пиво ичиш баҳонаси билан сайрга таклиф қилиб, ташландиқ бинога олиб борган. “Комсомолская правда” нашрининг полициядаги манбасига кўра, қизлар одамларнинг қандай ўлишини кўрмоқчи бўлган.
Айрим манбаларда қизлар қотилликни телефонга тасвирга олгани ва бу қандайдир видео-челленжнинг бир қисми бўлгани айтилмоқда. Бошқа манбаларга кўра эса, улар изларни яшириш учун телефонларини атайлаб ўзлари билан олиб кетмаган. Жиноятдан сўнг қизлар уйларига қайтган.
Ҳалок бўлган боланинг онаси Ирина “MSK1” нашрига берган интервьюсида қизлар бошқа қотилликларни ҳам режалаштирганини айтган. Унинг сўзларига кўра, тергов кўриб чиқаётган версиялардан бири қизларнинг Жанубий Кореянинг “Кальмар ўйини” сериалидан таъсирланган бўлиши билан боғлиқ.
“Кальмар ўйини” сериалида қаҳрамонлар омон қолиш учун шафқатсиз ўйинларда беллашади. Иринанинг айтишича, терговчилар бундай тахминга қизлардан бирининг хонасида сериалга оид плакатлар бўлгани сабаб келган.
Шунингдек, гумондорлардан бирининг TikTok саҳифидан сериалдаги қотилликлар акс этган видеолавҳа топилгани хабар қилинган.
Кабаново қишлоғи аҳолисидан бири эса икки қизни “босиқ ва жанжалкаш бўлмаган” деб таърифлаган. Унинг айтишича, қизлар бир-бири билан яқин муносабатда бўлган ва тез-тез бирга вақт ўтказган.
Маҳаллий аёлнинг сўзларига кўра, қизларнинг ёнидан 50 кишининг исми киритилган рўйхат топилган. Унда ҳалок бўлган бола ҳам бўлган. У қизларнинг ҳеч қандай субмаданиятга, жумладан, сатанизмга алоқаси бўлмаганини, бироқ “Кальмар ўйини”га жуда берилиб кетганини айтган.
REN нашри ҳуқуқ-тартибот идораларига яқин манбаларга таяниб, гумондорлардан бири сўроқ пайтида узоқ вақтдан бери қон нималигини ва одам ўлдириш қандай бўлишини билишни истаганини тан олганини ёзди.
Ҳозирда тергов давом этмоқда.
