Непалдаги сув тошқинларида бедарак йўқолганлар сони 1 900 нафарга етди
Табиий офат оқибатида камида 580 киши ҳалок бўлган.
Непалда кучли сув тошқинлари оқибатида бедарак йўқолганлар сони 1 900 нафарга етди. Табиий офат оқибатида камида 580 киши ҳалок бўлган. Бу ҳақда The New York Times Непалнинг табиий офатларга ёрдам агентлигидаги манбага таяниб хабар берди.
Қидирув-қутқарув ишлари давом этар экан, қурбонлар ва бедарак йўқолганлар сони ортиб бормоқда. Мутасаддилар фалокат кўлами ва унинг оқибатларини аниқлаш ишларини давом эттирмоқда.
Шунингдек, Хитойнинг Тибет ҳудудида ҳам 500 дан ортиқ киши бедарак йўқолгани, камида 5 киши ҳалок бўлгани маълум қилинган.
Непал ҳукумати хорижий қутқарув мутахассисларига табиий офат оқибатларини бартараф этиш ишларида иштирок этишга рухсат берган. Чекланган миқдордаги хорижий мутахассислар ҳалок бўлганларнинг шахсини аниқлаш ва жасадларни яқинларига топшириш жараёнига жалб этилади.
Эслатиб ўтамиз, кучли сув тошқини 26 август куни Непалнинг шимолий қисмида юз берган эди. Дастлабки маълумотларга кўра, бунга Хитой чегараси яқинида юз берган тош ва қор кўчкиси сабаб бўлган. Сув, тош ва лой оқими дарё бўйлаб қарийб 70 километр масофага тарқалиб, аҳоли пунктларига жиддий зарар етказган.
Россиянинг Непалдаги элчихонаси ҳам табиий офат ҳудудида бўлган бўлиши мумкин бўлган саккиз нафар Россия фуқароси билан алоқа узилганини маълум қилди. Уларни қидириш ишлари давом этмоқда.
