Россиянинг Киев вилоятига ҳужуми оқибатида 37 киши ҳалок бўлди

Россиянинг Киев вилояти Буча туманидаги ўқ-дорилар омборига берган зарбаси ва ундан кейинги портлашлар оқибатида камида 37 киши ҳалок бўлди. Яна 42 киши жароҳатланган, улардан тўрт нафари бола. Бу ҳақда Киев вилояти давлат маъмурияти раҳбари Тимур Ткаченкога таяниб, BBC хабар берди.

 

Ҳалок бўлганларнинг 34 нафари қариялар пансионатида бўлган. Қурбонлар орасида Дмитривка жамоаси раҳбари Тарас Дидич ҳам бор.

 

Украина президенти Владимир Зеленский ҳодисани одамлар яқинида портловчи моддаларни сақлаш билан боғлиқ “даҳшатли бепарволик” деб атади. Унинг сўзларига кўра, Россия ҳужуми вақтида ўқ-дорилар сақланадиган ҳудудга зарба берилган ва бунинг ортидан снарядлар, миналар, бошқа ўқ-дорилар ҳамда дронлар детонацияси юз берган.

 

Украина расмийлари 29 августга ўтар кечаси Буча туманидаги Миля қишлоғида жойлашган корхоналардан бирида ҳужум ортидан кучли ёнғин ва портлашлар юз берганини билдирди. Фавқулодда вазият ҳудудидан қарийб 400 киши эвакуация қилинган. Портлашлар сабаб Житомир трассасининг 15–32-километрлари оралиғидаги қисмида транспорт ҳаракати тўлиқ тўхтатилган.

 

Россия Мудофаа вазирлиги эса Миля қишлоғида Fire Point компаниясининг ўқ-дорилар омбори зарбага учраганини маълум қилди. Вазирлик маълумотига кўра, у ерда FP-1 ва FP-2 узоқ масофага учувчи дронлар учун бутловчи қисмлар ва старт тезлаткичлари сақланган.

 

Портлашлар оқибатида атрофидаги инфратузилмага, жумладан, турар жойлар ва қариялар пансионатига зарар етган. Қарийб 50 та турар жой биноси турли даражада шикастланган.

 

Ҳодиса юзасидан Украина Миллий полицияси ва Украина Хавфсизлик хизмати судгача тергов олиб бормоқда. Ўқ-дориларни аҳоли яшайдиган ҳудуд яқинида сақлашга йўл қўйган мансабдор шахсларга нисбатан хизмат вазифаларига бепарволик билан муносабатда бўлиш моддаси бўйича жиноят иши қўзғатилган.

 

Украина президенти Володимир Зеленский одамларнинг ўлимига сабаб бўлган қарорлар учун айбдорлар “жавобгарликка тортилиши керак”лигини таъкидлади.

 

Украина Қуролли кучлари Ҳарбий-ҳаво кучлари маълумотига кўра, 29 августга ўтар кечаси Россия Украина ҳудудига “Оникс” кемага қарши ракетаси, “Искандер-М” баллистик ракетаси ва 267 та ҳужумчи дрон учирган. 29 август соат 11:30 ҳолатига кўра, “Шаҳед” дронларининг Киев вилоятига ҳужуми давом этган.