Трамп Ой объектларидан бирига ўз номини бермоқчи
Сўнгги вақтларда АҚШ президенти географик объектларни қайта номлаш ташаббуслари билан ҳам чиқмоқда.
АҚШ президенти Доналд Трамп Ойдаги объектлардан бирига унинг номини бериш мумкинлигини айтди. У бу ҳақда Техасдаги космик марказда сунъий йўлдошдаги объектларни муҳокама қилиш чоғида гапирган.
“Умид қиламанки, улар менинг номим билан шунга ўхшаш нарсани номлашади”, деган Трамп.
Тадбир давомида АҚШ президенти Artemis II миссияси қўмондони, америкалик астронавт Рид Вайсманни кутиб олган. Трамп Ойдаги кратерлардан бири Вайсманнинг саратон касаллигидан вафот этган рафиқаси Керол шарафига номланганини эслатган.
АҚШ президенти Ой инсонлар хотирасини сақлаб қолиши мумкинлигини таъкидлаб, Ойдаги бирор объектга ўз номининг берилишини ҳам маъқуллашини билдирган.
Тадбирда Трамп АҚШда космик академия ташкил этиш тўғрисидаги фармонни ҳам имзолаган.
Сўнгги вақтларда АҚШ президенти географик объектларни қайта номлаш ташаббуслари билан ҳам чиқмоқда. Аввалроқ у Мексика кўрфазини “Америка кўрфази” деб аташ ташаббусини илгари сурган. Шунингдек, Канада билан савдо таранглиги фонида Онтарио кўлини “Америка кўли” деб қайта номлаш тўғрисидаги фармонни имзолаган.
Трамп номи Флорида штатидаги автомагистраль ва аэропортга ҳам берилган. Вашингтондаги Кеннеди маркази фасадига унинг номини қўшиш ташаббуси эса кейинчалик суд қарори билан бекор қилинган.
