Вашингтонда Трамп сиёсатига қарши оммавий намойиш ўтказилди

АҚШ пойтахти Вашингтон шаҳрида бир неча минг киши иштирокида Трамп маъмурияти сиёсатига қарши намойиш бўлиб ўтди. ТАССнинг хабар беришича, тадбир National Mall ҳудудида, Оқ уй яқинида ташкил этилган.

“Вашингтонга юриш: 2026. Овоз бериш ҳуқуқларини ҳимоя қилинг” номли намойиш иштирокчилари дастлаб Авраам Линколн ёдгорлиги олдида тўпланган. Тадбир 1963 йилда Вашингтонда ўтказилган Иш ўринлари ва Озодлик учун юришнинг 63 йиллигига бағишланган.

Намойишда касаба уюшмалари вакиллари, талабалар, фуқаролик ҳуқуқлари фаоллари ҳамда турли жамоат ташкилотлари иштирок этган. Тадбир давомида сиёсатчилар ва ижтимоий ҳаракатлар етакчилари сўзга чиққан.

Мустақил сенатор Берни Сандерс АҚШда сиёсий ва иқтисодий эркинликлар ўзаро чамбарчас боғлиқ эканини таъкидлаган. У овоз бериш ҳуқуқлари, ишчилар манфаатлари, даромадлар тенгсизлиги ва сайлов кампанияларини молиялаштириш билан боғлиқ масалаларга эътибор қаратган.

Вакиллар палатасидаги Демократлар озчилик етакчиси Хаким Жеффрис эса мамлакат «чорраҳада» турганини айтиб, Конгресснинг ҳар икки палатасида сиёсий назоратни қайта қўлга киритиш зарурлигини билдирган.

Намойишчилар, шунингдек, АҚШ маъмуриятининг овоз бериш тартибларига оид сиёсатини танқид қилиб, фуқаролик ҳуқуқларини ҳимоя қилишга чақирган. Улар “Трамп, сайловлардан қўлингизни тортинг!”, “Орзу ҳали амалга ошмади!” каби шиорлар ёзилган плакатларни кўтариб чиққан.

Тадбир давомида намойишчилар National Mall бўйлаб юриш қилиб, фуқаролик ва сайлов ҳуқуқларини ҳимоя қилишга чақирган. Полиция хавфсизлик чораси сифатида ҳудуддаги қатор кўчаларни ёпган.

Намойиш иштирокчилари АҚШда фуқаролик ҳуқуқлари, тенглик ва овоз бериш имкониятларини таъминлаш бўйича кураш давом этаётганини таъкидлаган.

Тадбир 1963 йилда Мартин Лютер Кинг томонидан Вашингтонда айтилган машҳур “Менинг орзуим бор” нутқи билан боғлиқ тарихий жойларда ўтказилгани билан ҳам эътибор қаратган.