Шимолий Кипр қирғоқларида 267 киши бўлган паром ағдарилди: 7 киши ҳалок бўлди
Ҳодиса оқибатида 23 киши бедарак йўқолган.
Шимолий Кипр қирғоқларида бортида 267 киши бўлган паром ағдарилиб кетди. Бу ҳақда Reuters хабар берди.
Ҳодиса оқибатида бир йўловчи ҳалок бўлган. Қутқарув ишлари давомида йўловчиларнинг аксарияти қирғоққа олиб чиқилган.
Турк-Кипр транспорт вазири Эрҳан Ариклининг Anadolu агентлигига маълум қилишича, паромда 259 нафар йўловчи ва 8 нафар экипаж аъзоси бўлган.
Кипр турклари етакчиси Туфан Эрҳурман 237 киши тирик қутқарилганини, етти киши ҳалок бўлганини ва 23 киши ҳали ҳам қидирилаётганини айтди.
Хусусий паром якшанба куни соат 12:30 да Шимолий Кипрнинг Кирения портидан Туркиянинг Мерсин вилоятидаги Тасужу портига йўл олган. Кема портдан чиқиб, кўп ўтмай номаълум сабабга кўра сув ола бошлаган ва ағдарилиб кетган.
Ҳодиса Кирения қирғоғидан тахминан 4 миль, яъни 6,4 километр узоқликда содир бўлган. Айрим хабарларда паром катамаран туридаги кема экани қайд этилган.
Қутқарув ишларига қирғоқ қўриқлаш хизмати ва хусусий кемалар жалб этилган. Қутқарилган йўловчилар Кирения портига олиб келинган ва у ердан шифохоналарга етказилган.
Кирения мери Мурат Шенкул CNN Türk телеканалига берган маълумотида ҳозиргача паромдаги 159 нафар йўловчи билан алоқа ўрнатилганини билдирган.
