Ҳиндистон ва Ўзбекистон ҳамкорлиги: иқтисодий ривожланиш ва тадбиркорликнинг янги уфқлари
Икки давлат тадбиркорлари металлургия, фармацевтика, агросаноат ва экспорт йўналишларида ҳамкорликни кенгайтирмоқда.
Ҳиндистон Бош вазири Нарендра Модининг айни кунларда Ўзбекистонга амалга ошираётган ташрифи ҳар томонлама тарихий воқелик бўлишига, икки халқ ўртасидаги дўстлик ва шерикликни мутлақо янги юксак босқичга олиб чиқишига катта умид боғлаймиз.
Президентимиз Шавкат Мирзиёевнинг олиб бораётган очиқ, изчил ва прагматик ташқи сиёсати туфайли бугун ўзбек тадбиркорлари учун жаҳон бозорлари, хусусан, дунёнинг энг тез ривожланаётган иқтисодиётларидан бири бўлган Ҳиндистон эшиклари кенг очилди.
Бунинг яққол исботи сифатида икки мамлакат ўртасидаги қўшма лойиҳалар портфели 5 миллиард доллардан ошганини кўришимиз мумкин.
Яқинда, яъни 2026 йил 3 август куни Нью-Деҳли шаҳридаги нуфузли "ITC Maurya" меҳмонхонасининг "Kamal Mahal" залида ўтказилган Ҳиндистон–Ўзбекистон бизнес-форумида шахсан иштирок этиб, бу юксак ишонч ва прагматик ёндашувнинг амалий натижасига гувоҳ бўлдим.
Форум доирасида биз хорижлик ҳамкорлар билан изчил музокаралар олиб бордик ва Ҳиндистон бозорига Ўзбекистонда ишлаб чиқарилган ош тузини экспорт қилиш бўйича муҳим стратегик битимларни имзоладик. Бу ўзбек маҳсулотларининг сифати ва рақобатбардошлиги халқаро майдонда тан олинаётганининг далолатидир.
Металлургия, фармацевтика ва агросаноат каби соҳалардаги ҳамкорлик икки давлат ишбилармонлари учун янги имкониятлар яратмоқда. Маъмурий тўсиқларнинг камаяётгани ва ўзаро бозорларга кириш соддалаштирилаётгани биз каби тадбиркорларни янада фаолроқ бўлишга ундамоқда.
Нарендра Модининг ушбу ташрифи Ҳиндистон–Ўзбекистон бизнес-форумида эришилган келишувларни ҳаётга тўлиқ татбиқ этишга ва иқтисодий алоқаларимизни янада мустаҳкамлашга кучли туртки бериши шубҳасиз.
Илҳомжон Боқижонов, тадбиркор
