Республика шошилинч тиббий ёрдам илмий марказида ёнғин чиқди
Реконструкция қилинаётган бино ҳовлисидаги электр қутиси ёнган.
31 август куни Чилонзор туманидаги Кичик ҳалқа йўли кўчасида жойлашган, Республика шошилинч тиббий ёрдам илмий марказига қарашли реконструкция қилинаётган бино ҳудудида ёнғин содир бўлди.
Тошкент шаҳар Фавқулодда вазиятлар бош бошқармаси маълумотига кўра, соат 14:48 да бино ҳовлисидаги электр қутиси ёнаётгани ҳақида хабар келиб тушган.
Ёнғин-қутқарув экипажлари соат 14:52 да воқеа жойига етиб бориб, ёнғинни 14:57 да тўлиқ бартараф этган. Ҳодиса оқибатида жабрланганлар ёки ҳалок бўлганлар йўқ.
Ёнғин натижасида электр қутиси ва унинг атрофидаги кондиционерлар зарарланган.
Ҳозирда ёнғиннинг келиб чиқиш сабаби ҳамда етказилган моддий зарар миқдори аниқланмоқда.
