Россиядан ота-она қарамоғидан маҳрум бўлган 12 нафар ўзбекистонлик бола ватанга қайтарилди
Яна 22 нафар болани Ўзбекистонга қайтариш бўйича чоралар кўрилмоқда.
Россиянинг турли ҳудудларида ота-она қарамоғидан маҳрум бўлган ёки оғир ижтимоий вазиятда қолган 12 нафар вояга етмаган Ўзбекистон фуқароси ватанга қайтарилди. Бу ҳақда “Дунё” АА хабар берди.
Болалар Ўзбекистоннинг Россиядаги элчихонаси, Ички ишлар вазирлиги, Соғлиқни сақлаш вазирлиги ҳамда Ижтимоий ҳимоя миллий агентлиги вакилларининг ҳамкорлигида олиб келинди.
Қайд этилишича, болаларнинг 8 нафари Москва вилоятидан, бир нафари Чувашия Республикасидан, бир нафари Москва шаҳридан, бир нафари Новосибирск вилоятидан ва яна бир нафари Тула шаҳридан олиб келинган.
Уларни ватанга қайтариш жараёнида шахсини аниқлаш, зарур ҳужжатларни расмийлаштириш ва тиббий кўрикдан ўтказиш билан боғлиқ масалалар ҳал этилган.
Маълумотларга кўра, 2026 йилнинг январь–август ойларида Россиянинг турли ҳудудларидан ота-она қарамоғидан маҳрум бўлган ёки оғир ижтимоий вазиятга тушиб қолган жами 38 нафар вояга етмаган Ўзбекистон фуқароси ватанга қайтарилган.
Ҳозирда яна 22 нафар болани Ўзбекистонга олиб келиш бўйича зарур ҳужжатлар тайёрланмоқда.
