Саида Мирзиёева Ўзбекистон халқини Мустақиллик байрами билан табриклади
Президент Администрацияси раҳбари ўз табригида мамлакат ривожи олдида қатор йирик вазифалар турганини таъкидлади.
Президент Администрацияси раҳбари Саида Мирзиёева Ўзбекистон Мустақиллиги куни муносабати билан табрик йўллади.
У Ўзбекистон Мустақиллиги куни сўнгги йилларда тубдан янгиланиб, дадил илгарилаётган мамлакатнинг улуғ айёми эканини таъкидлади.
«Президентимиз Шавкат Мирзиёев ўз нутқида келгуси ўн йилликни “Миллий юксалиш даври” деб эълон қилдилар», — деб ёзди Саида Мирзиёева.
Унинг қайд этишича, олдинда кенг кўламли миллий дастурларни амалга ошириш ва муҳим вазифаларни ҳал этиш турибди. Жумладан, билим ва кўникмаларни амалий капиталга айлантириш, аҳоли саломатлиги ва узоқ умр кўришини таъминлаш, юқори технологияларга асосланган иқтисодиётни барпо этиш, сув ресурсларидан оқилона фойдаланиш ва атроф-муҳитни асраш, қонун устуворлигини тўлиқ кафолатлаш, маҳалла институтини мустаҳкамлаш ҳамда Ўзбекистоннинг халқаро майдондаги обрў-эътиборини янада юксалтириш шулар жумласидандир.
«Байраминг муборак бўлсин, жонажон Ўзбекистоним!» — дея табрикни якунлади Саида Мирзиёева.
