Ўзбекистон Президенти Бутунжаҳон кўчманчилар ўйинларининг очилиш маросимида иштирок этди
Мусобақаларда 90 дан ортиқ мамлакатдан 3 мингдан зиёд спортчи иштирок этмоқда.
Ўзбекистон Республикаси Президенти Шавкат Мирзиёев Бишкек шаҳрига ташрифи доирасида VI Бутунжаҳон кўчманчилар ўйинларининг тантанали очилиш маросимида қатнашди.
“Бишкек-Арена” стадионида бўлиб ўтган тадбирда Шанхай ҳамкорлик ташкилотига аъзо давлатлар раҳбарлари ва бошқа меҳмонлар иштирок этди.
Мусобақаларда 90 дан ортиқ мамлакатдан 3 мингдан зиёд спортчи, жумладан, Ўзбекистондан 141 нафар спортчи иштирок этмоқда. Юртдошларимиз 30 та спорт тури, хусусан, кураш, самбо, армрестлинг, камондан ўқ отиш ва от спорти бўйича беллашади.
Иштирокчиларга кўчманчи халқларнинг бой маданияти ва тарихи, анъана ҳамда урф-одатларига бағишланган театрлаштирилган саҳна кўринишлари намойиш этилди.
