Истанбулда адашиб масжидга келиб қолган 13 ёшли ўзбекистонлик қиз онасига топширилди
Масжид имоми хабар бергач, дипломатлар вояга етмаган болани консулхонага олиб келиб, унинг яқин қариндошлари билан боғланган.
Ўзбекистоннинг Истанбулдаги Бош консулхонаси 13 ёшли Ўзбекистон фуқароси С.Ж. билан боғлиқ ҳолат юзасидан расмий муносабат билдирди.
Бош консулхона маълумотига кўра, 30 август куни соат 22:30 да Бейoғлу туманидаги масжидлардан бирининг имоми консулхонага қўнғироқ қилиб, вояга етмаган Ўзбекистон фуқароси ҳақида хабар берган.
Дипломатлар зудлик билан воқеа жойига бориб, С.Ж.ни Бош консулхонага олиб келган. Шундан сўнг унинг яқин қариндошларини аниқлаш ва улар билан боғланиш бўйича тегишли чоралар кўрилган.
1 сентябрь куни 13 ёшли С.Ж. соғ-саломат онасига топширилган.
Бош консулхона ушбу ҳолатда ёрдам кўрсатган Туркиянинг тегишли идоралари ҳамда фуқароларига миннатдорлик билдирган.
