Шавкат Мирзиёев мактаб ўқувчилари, устоз ва ота-оналарни Билимлар куни билан табриклади

Ўзбекистон Президенти Шавкат Мирзиёев Ўзбекистон мустақиллигининг 35 йиллик қутлуғ байрамига уйғун ва ҳамоҳанг ҳолда ўтаётган Билимлар куни билан мактаб ўқувчилари, устоз-мураббийлари ва ота-оналарига табрик йўллади.

 

“Янги ўқув йили мамлакатимизнинг бутун таълим тизимида, мактаб, лицей, техникум ва олийгоҳларимиз ҳаётида янги маърифий юксалиш йили бўлсин!” — деди Президент.

 

Президент мактаб таълимидаги ислоҳотлар натижасида Янги Ўзбекистон мактаблари янгича қиёфа касб этиб, таълим сифати такомиллашиб бораётганини таъкидлади. У ўқиш, касбий таълим, IT, ижод, спорт ва жамоат ишларида ютуқларга эришаётган ёшларни мамлакатнинг “нурли келажаги, олтин фонди” деб атади.

 

“Бундай билимли, зукко, тиришқоқ ва интилувчан, сафлари йил сайин кенгайиб бораётган фарзандларимиз тимсолида биз Учинчи Ренессанс ниҳолларини кўрамиз”, — деди Шавкат Мирзиёев.

 

Президент таълим-тарбия соҳасини ривожлантиришга бундан буён ҳам устувор аҳамият қаратилишини маълум қилди. Унинг қайд этишича, мактабни тамомлаётган ёшлар пухта билим билан бирга камида битта замонавий касб-ҳунарни эгаллаши учун шароитлар яратилади. Шу мақсадда ҳудудларда “Касблар шаҳарчалари” ташкил этилиб, уларга замонавий тажриба ва илғор мутахассислар жалб этилади.

 

Шунингдек, давлат раҳбари ёшларни янги билим, ғоя ва инновациялар, касб-ҳунарлар, она тили, тарих ва маданиятни пухта эгаллашга, жаҳон тарихи ва хорижий тилларни ўрганишга чақирди.

 

“Азиз фарзандларим, сизларга бахтли ва саодатли ҳаёт эшикларини очадиган калит ҳам, умр йўлларингизда пайдо бўладиган мураккаб саволларнинг ечими, синов ва машаққатларни енгиб ўтишнинг кафолати ҳам фақат билим, билим ва билимдир”, — деди Президент.

 

Шавкат Мирзиёев ўқувчиларга янги ўқув йилини аъло баҳолар билан бошлаш, чоракларни муваффақиятли якунлаш, сиҳат-саломатлик, омад ва зафар тилади.

 

Маълум қилинишича, бу йил мамлакат мактаблари остонасидан 800 минг нафарга яқин ўғил-қиз янги ўқув йилини бошламоқда.