Зироат Мирзиёева Бишкекдаги маданий тадбирларда иштирок этди
ШҲТ саммити доирасида қирғиз халқининг санъати ва анъаналари намойиш этилди.
Ўзбекистон Биринчи хоними Зироат Мирзиёева 1 сентябрь куни Бишкек шаҳрида Шанхай ҳамкорлик ташкилоти саммити доирасида ўтказилган маданий тадбирларда иштирок этди.
Тадбирда Қирғизистон, Озарбайжон, Туркия ва Хитойнинг Биринчи хонимлари ҳам қатнашди.
Меҳмонлар қирғиз халқининг амалий безак санъати намуналари намойиш этилган кўргазма билан танишди. Шунингдек, “Салбуурун” миллий федерацияси вакиллари қирғиз тайганлари ва қўлга ўргатилган бургутларни намойиш этиб, анъанавий овчилик маданияти ҳақида маълумот берди.
Дастур якунида олий мартабали меҳмонлар учун “Энесай” қабул уйида Қирғизистоннинг болалар мусиқа ва рақс жамоалари иштирокида концерт дастури намойиш этилди.
